Qonşu Avropa İttifaqı (Aİ) ölkələrindən Ukrayna və Moldova üçün elektrik enerjisi ixrac imkanları qışda artırıla bilər.

“Report” xəbər verir ki, bu barədə Avropa Komissiyası (AK) Avropanın ötürücü sistem operatorlarına (TSO) istinadən məlumat verib.

“Enerji sisteminin vəziyyətinin birgə qiymətləndirilməsinə əsasən, Elektrik Enerjisi üzrə Avropa Ötürmə Sistemləri Operatorları Şəbəkəsi (ENTSO-E) bu gün elan edib ki, ixrac limiti enerjisi sistemin sabitliyi və istismar təhlükəsizliyi saxlanılmaqla dekabrın 1-dən 1 700 MVt-dan 2 100 MVt-a qədər artırıla bilər”, - AK-nın kommünikesində deyilir.

“Bugünkü açıqlama Aİ-nin Ukrayna və Moldovaya güclü dəstəyinin və Avropa TSO icmasının həmrəyliyinin daha bir əlamətidir”, - AK-nın enerji məsələləri üzrə komissarı Kadri Simson deyib.

Xatırladaq ki, AK-nin rəhbəri Ursula fon der Lyayen sentyabrın 19-da Beynəlxalq Enerji Agentliyinin icraçı direktoru Fatih Birol ilə birgə mətbuat konfransında Aİ-nin qarşıdan gələn qış mövsümündə enerji sektorunda Ukraynaya kömək etməsinin üç istiqamət - təmir, birləşmə və sabitləşdirmə üzrə olacağını bildirmişdi.

“Məqsəd əhalinin bilavasitə ehtiyaclarını ödəməkdir, eyni zamanda biz Ukraynanın enerji sistemini uzunmüddətli perspektivdə daha da dayanıqlı edirik”, - AK sədri bildirib.

Oxşar xəbərlər

BMT: Ukrayna sakinləri qışda 18 saata qədər işıqsız qala bilərlər

“Transelectrica”nın “yaşıl enerji” dəhlizi layihəsində iştirakı təsdiqlənib

Naxçıvanla Türkiyə arasında elektrik enerjisi mübadiləsi olacaq

Naxçıvanda elektrik enerjisi istehsalının 55 %-i “yaşıl enerji”nin payına düşür