Azərbaycan İslam Əməkdaşlıq Təşkilatında (İƏT) həm aktivliyi, həm də maliyyə dəstəyi ilə mühüm şəkildə yardım edən üzv ölkələrdən biridir.

Bunu "Report"un Türkiyə bürosuna açıqlamasında ölkənin xarici işlər nazirinin müavini Musa Kulaklıkaya bildirib.

2015-2019-cu illərdə İslam Ölkələri üzrə Statistik, İqtisadi və Sosial Tədqiqatlar və Təlim Mərkəzinin (SESRIC) baş direktoru, İƏT-də Baş katibin İnzibati və Maliyyə Məsələləri üzrə müavini vəzifələrində çalışmış M.Kulaklıkaya deyib ki, islam aləmindəki bu fəaliyyəti dönəmində Azərbaycanın fəal dəstəkçi olduğuna şahidlik edib:

"İyunun 22-dən Bakıda İƏT-ə üzv olan dövlətlərin Parlament İttifaqı Konfransının 20-ci Sessiyasının öz işinə başlaması da bunu deməyə əsas verir. Azərbaycan fəal üzv olaraq İslam Əməkdaşlıq Təşkilatı Zirvəsinə də ev sahibliyi edəcək. Azərbaycanın şəhərləri zaman-zaman islam dünyasının müxtəlif sahələr üzrə paytaxtları elan edilir. Məsələn, şəhərlər İslam Mədəniyyət Paytaxtı, Gənclər Paytaxtı, Turizm Paytaxtı kimi statuslar qazanaraq bu beynəlxalq təşkilatın mühüm layihələrində ön sıralarda yer alır. Bununla da həm öz potensialını dünyaya tanıdır, həm də digər müsəlman ölkələri üçün nümunə olur.

Ona görə də Azərbaycan həm İslam Əməkdaşlıq Təşkilatı daxilində və ümumilikdə, islam dünyasında xüsusi əhəmiyyətə malik dövlətdir. Biz hər zaman qardaş Azərbaycanın müsbət və konstruktiv yanaşmalarını görmüşük".

İƏT-də Azərbaycan-Türkiyə əməkdaşlığının da uğurlu nəticələr verdiyini vurğulayan Türkiyə rəsmisi deyib ki, hər iki ölkə bu qurumla bağlı qərarlarda da həmrəylik nümayiş etdirir:

"Azərbaycanla Türkiyə bütün sahələrdə birgə əməkdaşlıqdan, həmrəylikdən uğurlu nəticələr qazanır, İslam Əməkdaşlıq Təşkilatında da bu həmrəyliyin davam edəcəyinə inanıram".

Qeyd edək ki, Ankarada iyunun 22-dən 25-dək Türkiyənin İslam Əməkdaşlıq Təşkilatının (İƏT) 51-ci Xarici İşlər Nazirləri Şurasına sədrliyi çərçivəsində, Türkiyə Ailə və Sosial Xidmətlər Nazirliyinin himayəsi altında dördgünlük "Gələcək naminə müttəfiqlik – 2026" proqramı təşkil edilib. Musa Kulaklıkaya bu tədbirdə islam coğrafiyasında qadınların fəaliyyəti və liderliyi mövzusunda çıxış edib.

Oxşar xəbərlər

SESRIC-in başçısı: Azərbaycanla sıx əməkdaşlıq edirik

Baş prokuror: Azərbaycan İslam həmrəyliyinin gücləndirilməsinə mühüm töhfələr verib

Azərbaycan və İslam Maliyyə Xidmətləri Şurası əməkdaşlıq perspektivlərini nəzərdən keçirib

Azərbaycan İslam Əməkdaşlıq Təşkilatına sədrlik edəcək

Muxtar Babayev İƏT rəsmisi ilə görüşüb