Pakistanda daşqınlar nəticəsində ölənlərin sayı 645 nəfərə çatıb - YENİLƏNİB 2

Pakistanda 26 iyun-16 avqust tarixləri arasında ölkə daxilində yağan güclü yağışların səbəb olduğu sel və torpaq sürüşmələrində 645 nəfər həlak olub.

Sizinxeber.az xəbər verir ki, bununla bağlı Pakistan Milli Fəlakət İdarəsi Agentliyi (NDMA) məlumat yayıb.

Pakistana təsir edən güclü musson yağışları sel və torpaq sürüşməsinə səbəb olub. Ölkədə təbii fəlakətlər nəticəsində ölənlərin sayı artmaqda davam etdiyi üçün səlahiyyətlilər yeni bəyanat yayıb.

Qeyd edək ki, dünən və ötən cümə günü baş verən fəlakətlərdə ən azı 351 nəfərin həlak olduğu, xilasetmə qruplarının dağıntılar altından cəsədləri çıxarmaq üçün hələ də işlər gördüyü açıqlanmışdı.

NDMA rəhbəri general-leytenant İnam Heydər builki musson yağışlarının keçən ilki ilə müqayisədə 50 faiz daha intensiv olduğunu və sentyabr ayına qədər daha üç yağışın gözlənildiyini bildirib.

O qeyd edib ki, iqlim dəyişikliyi Pakistana ciddi təsir edib və xüsusilə Buner, Bajaur və Battaqram rayonlarında geniş dağıntılara səbəb olub.

***

12:32

Pakistanın şimal-qərb hissəsində son iki gündə daşqın fəlakəti nəticəsində ölənlərin sayı 351 nəfərə çatıb.

Sizinxeber.az “Reuters“ə istinadən xəbər verir ki, bu barədə Pakistan rəsmiləri məlumat verib.

Geo News kanalının xəbərinə görə, fəlakətin mənfi təsirləri bölgədə hələ də davam edir.

Xayber Paxtunxva əyalətində bir çox ərazi “fəlakət zonası” elan edilib.

Rəsmilər bildiriblər ki, insan itkisinin artmasından narahatdırlar.

***

16 avqust

Saat 12:41

Pakistanın şimal-qərb hissəsində son iki gündə daşqın fəlakəti nəticəsində ölənlərin sayı 300 nəfəri ötüb.

Sizinxeber.az “Reuters”ə istinadən xəbər verir ki, bu barədə Pakistan rəsmiləri məlumat verib.

Hazırda xilasetmə və axtarış tədbirlərinin davam etdiyi bildirilib.

İtkin düşənlərin dəqiq sayı məlum deyil.

Məlumata görə, güclü yağışların avqustun 21-ə kimi davam etməsi gözlənilir.