Sizinxeber.Az-ın TASS-a istinadla verdiyi məlumata görə,ABŞ Prezidenti Donald Tramp təsdiqləyib ki, Vladimir Zelenski bu cümə günü Vaşinqtona gələcək və Ukraynanın təbii sərvətləri ilə bağlı bir anlaşma imzalanacaq. "Prezident Zelenski cümə günü gələcək. Bu artıq təsdiqlənib və biz çox böyük bir anlaşma imzalayacağıq," – Tramp kabinetinin ilk iclasında bildirib.

Fevralın 25-də Tramp Zelenskinin fevralın 28-də Vaşinqtona gələ biləcəyini və minerallar haqqında saziş imzalayacağını söyləmişdi. ABŞ lideri fevralın əvvəlində bildirmişdi ki, Birləşmiş Ştatlar Ukraynanın nadir yeraltı sərvətlərinə çıxış əldə etməyə çalışır. Fevralın 12-də ABŞ-ın Maliyyə naziri Skott Bessent təbii sərvətlərlə bağlı anlaşmanı Zelenskiyə təqdim etmişdi.

Zelenski sazişi imzalamağa hazır olduğunu bildirsə də, nə Bessentlə görüşü zamanı, nə də Münhendə ABŞ-ın vitse-prezidenti JD Vance ilə görüşündə bunu etmədi. Zelenski ona təqdim olunan layihədə təhlükəsizlik təminatlarının olmadığını iddia etdi. Lakin ABŞ-ın Milli Təhlükəsizlik müşaviri Mayk Valtz fevralın 21-də bəyan etdi ki, Zelenski tezliklə ABŞ ilə sazişi imzalayacaq. Daha sonra Zelenskinin ofisindəki mənbələr Ukrayna mediasına bildiriblər ki, sənədin hələ də yekunlaşdırılması lazımdır. Zelenski isə fevralın 23-də keçirilən mətbuat konfransında bəyan edib ki, o, ABŞ ilə bu anlaşmanı imzalamaq "istəmir", çünki onun fikrincə, bu sazişin maliyyə yükünü gələcək Ukrayna nəsilləri daşımalı olacaq.