AVF rəsmisi beynəlxalq yarışa təyinat alıb

Azərbaycan Voleybol Federasiyasının (AVF) kominikasiya şöbəsinin rəhbəri Zöhrab Gözəlbəyli Çelenc Kuboku matçına supervayzer təyin olunub.

Federasiyadan "Report"a verilən məlumata görə, qurum rəsmisi qadın voleybolçular arasında 1/16 finalında “Rapid Buxarest" (Rumıniya) və “Roma Volley” (ITA) komandalarının cavab qarşılaşmasında hakimlərin işini qiymətləndirəcək.

Noyabrın 12-də Rumıniyanın paytaxtı Buxarestdə keçiriləcək oyunu danimarkalı Morten Enqborq Kleyn və bolqarıstanlı Milena Lazarova-Pyova idarə edəcəklər.

Qeyd edək ki, komandalar arasında baş tutan ilk matçda İtaliya təmsilçisi 3:0 hesabı ilə qalib gəlib.