25 may tarixində Azərbaycan Respublikası Xarici İşlər Nazirliyinin təşkilatçılığı, Qoşulmama Hərəkatı Gənclər Təşkilatı və Bakı Dövlət Universitetinin əməkdaşlığı ilə hər il beynəlxalq səviyyədə qeyd edilən “Afrika Günü”nə həsr olunmuş konfrans keçirilib.

APA xəbər verir ki, bu barədə Azərbaycan Xarici İşlər Nazirliyinin mətbuat xidməti məlumat yayıb.

Bildirilib ki, “Yüksələn qitə, yeni tərəfdaşlıqlar” mövzusunda keçirilən konfransda Afrika ölkələrinin Azərbaycanda akkreditə olunmuş səfirləri, Azərbaycanla Afrika ölkələri arasında parlamentlərarası əlaqələr üzrə Milli Məclisin işçi qruplarının sədrləri, dövlət qurumlarının nümayəndələri, ali təhsil müəssisələrinin rəhbərləri, ekspertlər, eləcə də ölkəmizdə təhsil alan afrikalı tələbələr iştirak edib.

Tədbirin açılış mərasimində çıxış edən xarici işlər nazirinin müavini Yalçın Rəfiyev Afrika qitəsinin artan geosiyasi və iqtisadi əhəmiyyətindən bəhs edərək Azərbaycan-Afrika ölkələri arasında siyasi səviyyədə yüksək səviyyəli təmasların son illərdə xüsusilə artdığını, iqtisadi istiqamətdə böyük artım vəd edən potensialın mövcud olduğunu vurğulayıb.

Həmçinin humanitar sahədə əməkdaşlıq istiqamətlərinə toxunan Y.Rəfiyev Heydər Əliyev Fondu və Azərbaycan Beynəlxalq İnkişafa Yardım Agentliyi (AIDA) vasitəsilə həyata keçirilmiş layihələrə və Ulu Öndər Heydər Əliyev adını daşıyan beynəlxalq təqaüd proqramı çərçivəsində afrikalı gənclər üçün təklif olunan təhsil imkanlarına diqqət çəkib.

Daha sonra, Azərbaycan Respublikası elm və təhsil nazirinin müavini Kənan Kərimzadə, Bakı Dövlət Universitetinin rektoru Elçin Babayev, Mərakeş Krallığının Azərbaycandakı fövqəladə və səlahiyyətli səfiri, diplomatik korpusun duayeni Adil Embarş çıxış ediblər. Bununla yanaşı, açılış mərasimində Afrika Birliyi Komissiyasının sədri Mahmud Əli Yusifin video müraciəti nümayiş etdirilib.

Konfrans çərçivəsində “Azərbaycan–Afrika münasibətləri: mövcud vəziyyət və strateji imkanlar”, habelə “2063 Gündəliyi və Afrikanın inkişaf edən beynəlxalq münasibətlər sistemində rolu” mövzularında iki panel müzakirəsi keçirilib.

Sözügedən müzakirələrdə Somali, Mərakeş, Əlcəzair, Sudan və Esvatinin səfirləri, AR-in Efiopiya və Keniyadakı səfirləri, Uqanda və Tanzaniyanın XİN rəsmiləri, habelə Milli Məclisin Əlcəzair və Keniya ilə parlamentlərarası işçi qruplarının sədrləri iştirak ediblər.

Bununla yanaşı, tədbir zamanı “Afrikada ASAN xidmət modeli” mövzusunda təqdimat baş tutub.

Konfransda afrikalı tələbələrin ifasında mədəni proqram, Afrika qitəsinin tarixinə dair xüsusi video təqdim edilib.

Konfrans proqramı çərçivəsində təşkil olunmuş sərgidə Zati-aliləri cənab Prezident İlham Əliyevin Afrikalı liderlərlə görüşlərini, eləcə də digər yüksək səviyyəli təmasları əks etdirən foto-şəkillər nümayiş etdirilib.

Konfransın bağlanış mərasimində çıxış edən Qvineya-Bisau Respublikasının beynəlxalq əməkdaşlıq və icmalar üzrə nazir müavini Fatumata Jau Azərbaycanla Afrika ölkələri arasında münasibətlərin strateji xarakter daşıdığını vurğulayıb.

Oxşar xəbərlər

“Texniki təhlükəsizliyin “Yaşıl” inkişafı” adlı elmi-praktiki konfrans keçirilib

Ceyhun Bayramov: Afrika ölkələri ilə Azərbaycanın əlaqələrinin genişlənməsi hər zaman prioritetdir

"Elm və ali təhsilin beynəlmiləlləşməsi" mövzusunda tədbir keçirilib

Bakıda Afrikada Fransanın neokolonializm siyasətinə həsr edilmiş beynəlxalq konfrans keçirilib - FOTO

Xankəndidə “Heydər Əliyev və Suveren Azərbaycan” mövzusunda konfrans keçirilir