Allahdan arzu edirəm ki, Cəbrayılda yaşamaq üçün heç olmasa bir-iki il ömür versin.

“Report” xəbər verir ki, bunu Cəbrayıl sakini, keçmiş məcburi köçkün Zəri Teymurova deyib.

“Cəbrayıla çatan kimi kəndimizi ziyarət edəcəyəm. Kəndə gedib dünyasını dəyişmiş doğmalarımın məzarlarını ziyarət edəcəyəm. Kəndimiz üçün çox darıxmışdım”, - o bildirib.

Keçmiş məcburi köçkün vurğulayıb ki, sevincinin həddi, hüdudu yoxdur:

“Uzun illər davam edən həsrətdən sonra Cəbrayıla həyat yoldaşım və övladlarımla qayıdıram. Allahdan arzu edirəm ki, orada yaşamaq üçün heç olmasa bir-iki il ömür versin. Ömrümüzün bundan sonrakı hissəsini orada keçirək”.

Qeyd edək ki, Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdışa dair I Dövlət Proqramına əsasən, yenidən qurulan Cəbrayıl şəhərinə növbəti köç karvanı yola salınıb. Bu mərhələdə Cəbrayıl şəhərinə daha 37 ailə - 212 nəfər köçürülüb.

Doğma yurda qayıdan Cəbrayıl sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban xanım Əliyevaya təşəkkür ediblər. Onlar, həmçinin torpaqlarımızı işğaldan azad edən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçən şəhidlərimizə rəhmət diləyiblər.

Hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 minə yaxın insan yaşayır.

Oxşar xəbərlər

Keçmiş məcburi köçkün: Cəbrayıla qayıtmaq bu gün qismət oldu

Keçmiş məcburi köçkün: “Arzu edirəm, övladımı Füzulidə evləndirim”

Keçmiş məcburi köçkün: Otuz iki ildən sonra nəhayət ki, yurdumuza qayıdırıq

84 yaşlı keçmiş məcburi köçkün: Şuşaya qayıtdığıma görə çox sevincliyəm

Şuşa sakini: 32 ildən sonra yurdumuza qayıtmağımıza sevinirik