Nazir müavini: "myGov" portalına artıq 40-dan çox şəxsi məlumat daxil edilib"

Hazırda "myGov" elektron hökumət portalının 600 min istifadəçisi var.

"Sizinxeber.az" xəbər verir ki, bunu rəqəmsal inkişaf və nəqliyyat nazirinin müavini Samir Məmmədov "PAŞA Holding"in təşkilatçılığı ilə Bakıda keçirilən "INMerge" İnnovasiya Sammitində deyib.

"Onlar vacib həyati hadisələri - valideyn olmaq, nikah, hər hansı ailə üzvünün vəfatı kimi hadisələrdə lazımi işləri rəqəmsal şəkildə həyata keçirə bilirlər. Həmçinin rəqəmsal şəxsiyyət vəsiqələri, nikah, doğum və ölüm sənədləri də daxil olmaqla 40-dan çox şəxsi məlumat "myGov"da mövcuddur", - S. Məmmədov bildirib.

Onun sözlərinə görə, ilin sonuna kimi vətəndaşların istifadə etdiyi fiziki xidmətlərin 15 %-nin "myGov" portalı vasitəsilə rəqəmsal formata keçirilməsi nəzərdə tutulub.