Azərbaycan Hesablama Palatası ilə Albaniyanın Ali Audit Orqanı arasında Anlaşma Memorandumu imzalanıb.

Bu barədə “Report” Hesablama Palatasına istinadən xəbər verir.

Bildirilib ki, sənəd palatanın sədri Vüqar Gülməmmədovun rəhbərlik etdiyi nümayəndə heyətinin Albaniyanın paytaxtı Tiranaya səfəri çərçivəsində imzalanıb. Səfər Albaniya Ali Audit Orqanının (AAO) yaradılmasının 100 illiyinə həsr olunmuş yubiley tədbirində iştirak məqsədi daşıyır.

Tədbir çərçivəsində Hesablama Palatasının sədri Vüqar Gülməmmədov və Albaniya AAO-nun rəhbəri Arben Şehu arasında ikitərəfli görüş keçirilib. Görüş zamanı Arben Şehu hər iki qurum arasında beynəlxalq əməkdaşlığın genişləndirilməsinin əhəmiyyətini vurğulayıb.

İmzalanan Anlaşma Memorandumu data analitikası, institusional potensialın gücləndirilməsi və əməkdaşların peşəkar inkişafı üzrə birgə fəaliyyətləri nəzərdə tutur.

Hər iki qurumun rəhbərləri bu sənədin davamlı və məhsuldar tərəfdaşlığın qurulmasına mühüm töhfə verəcəyinə, eyni zamanda auditin keyfiyyətinin artırılmasına xidmət edəcəyinə əminliklərini bildiriblər.

Oxşar xəbərlər

Azərbaycan və Rusiyanın Hesablama Palataları əməkdaşlığı genişləndirir

Hesablama Palatası bu il üçün prioritetlərini açıqlayıb

Azərbaycan və Braziliya Anlaşma Memorandumu imzalayıb

Azərbaycan və Almaniya Milli Antidopinq Agentlikləri arasında Anlaşma Memorandumu imzalanıb

Hesablama Palatası şəffaflığı və ictimai iştirakçılığı artırır