Avropa Yenidənqurma və İnkişaf Bankı (EBRD) Trans-Xəzər dəhlizinin inkişafına 230 milyon avro ayırır.

"Sizinxeber.az-Economics" banka istinadən xəbər verir ki, EBRD Trans-Xəzər Beynəlxalq Nəqliyyat Marşrutu üzrə yük və sərnişin daşımalarının inkişafını dəstəkləmək məqsədilə Qazaxıstanda strateji yol layihəsinə 230 milyon avroyadək kredit ayıracaq.

Vəsait Qazaxıstanın dövlətə məxsus milli avtomobil yolları operatoru “QazAvtoJol”a təqdim ediləcək və Aktobe ilə Ulqaysın şəhərləri arasında yerləşən 234 kilometrlik yol hissəsinin modernləşdirilməsinin tamamlanmasına yönəldiləcək. Layihənin birgə maliyyələşdirilməsində Asiya İnfrastruktur İnvestisiya Bankı (AIIB) da iştirak edir.

Layihə çərçivəsində mövcud II kateqoriyalı avtomobil yolu I kateqoriyalı magistrala çevriləcək. Yenilənən hissə Qərbi Avropa–Qərbi Çin nəqliyyat dəhlizinin, Mərkəzi Asiya Regional İqtisadi Əməkdaşlıq (CAREC) Dəhlizi 1-in və Avropa E38 marşrutunun tərkib hissəsidir.

EBRD bildirir ki, layihə Qazaxıstanın Avropa ilə Asiya arasında etibarlı tranzit qovşağı kimi rolunu gücləndirəcək və Trans-Xəzər dəhlizi boyunca yük axınının daha səmərəli təşkilinə imkan verəcək.

Yolun tikintisi və saxlanılması “layihələndir, tik və saxla” (DBM) modeli əsasında həyata keçiriləcək. Yeni magistral elektron ödəniş sistemləri, hərəkət zamanı çəki ölçən sensorlar və hava proqnozlaşdırma avadanlıqları kimi ağıllı nəqliyyat sistemləri ilə təchiz olunacaq.

Bununla yanaşı, Qazaxıstanın Nəqliyyat Nazirliyi və EBRD ölkənin yol sektorunun rəqəmsallaşdırılması üzrə əməkdaşlığı genişləndirəcək. Tərəflər yol aktivlərinin idarə olunması üçün “E-Joldar” rəqəmsal platformasının inkişafını və intellektual yol nəzarəti həllərinin tətbiqini nəzərdə tuturlar.

Qeyd edək ki, EBRD indiyədək Qazaxıstanda 354 layihə vasitəsilə 12,8 milyard ABŞ dolları həcmində investisiya yatırıb. Qazaxıstan hazırda Mərkəzi Asiyada EBRD-nin ən böyük investisiyalarının olduğu ölkə hesab olunur.

Oxşar xəbərlər

EBRD Azərbaycandakı cari layihə portfelini və əməliyyat aktivlərini artırıb

EBRD Azərbaycanda cari layihələr portfelini və əməliyyat aktivlərini artırıb

Azərbaycanda EBRD-nin cari layihə portfelinin dəyəri 950 milyon avroya düşüb

EBRD Azərbaycanda cari layihə portfelini yeniləyib

EBRD Şəkidə su təchizatı sisteminin inşasına 91 milyon avro kredit ayırıb