Azərbaycan və Özbəkistan gömrük sahəsində səmərəli əməkdaşlıq qurub, lakin onun genişləndirilməsi üçün potensial mövcuddur.

"Sizinxeber.az" xəbər verir ki, bu barədə Özbəkistan Gömrük Komitəsinin sədri general-mayor Akmalxoca Mavlonovun məqaləsində deyilir.

"Son illərdə Özbəkistan-Azərbaycan münasibətləri strateji tərəfdaşlıq səviyyəsinə yüksəlib və siyasi dialoq, ticari-iqtisadi əməkdaşlıq, nəqliyyat-logistika əlaqələri və regional inteqrasiya sahələrində ardıcıl surətdə möhkəmlənir", - o yazıb.

Sədrin sözlərinə görə, iki dövlət liderlərinin qarşılıqlı etimada və sıx dostluğa əsaslanan dialoqu sayəsində yeni institusional əməkdaşlıq mexanizmləri formalaşır və bir çox birgə təşəbbüslər praktiki müstəviyə keçir.

"Xüsusilə Şərq-Qərb və Mərkəzi Asiya-Qafqaz istiqamətləri üzrə nəqliyyat-kommunikasiya əlaqələrinin inkişafı Özbəkistan və Azərbaycan üçün strateji əhəmiyyət kəsb edir. Bu proses xarici ticarət həcminin artırılması, yükdaşıma zəncirlərinin şaxələndirilməsi və regional tranzit potensialının yüksəldilməsində mühüm amilə çevrilir. Bu baxımdan ticarət proseslərinin operativliyinin və şəffaflığının təmin edilməsində iki ölkənin gömrük xidmətləri arasında sıx əməkdaşlıq xüsusi yer tutur", - Mavlonov yazıb.

O qeyd edib ki, Özbəkistan və Azərbaycan arasında gömrük sahəsində məlumat mübadiləsi, risklərin idarə edilməsi, rəqəmsal texnologiyaların tətbiqi, eləcə də kadrların ixtisasının artırılması istiqamətində səmərəli əməkdaşlıq qurulub:

"Azərbaycan gömrük xidmətinin rəqəmsallaşdırma və intellektual nəzarət mexanizmlərinin tətbiqi sahəsində təcrübəsi, eləcə də Özbəkistanda həyata keçirilən rəqəmsal transformasiya prosesləri xüsusi əhəmiyyət kəsb edir ki, bu da qarşılıqlı təcrübə mübadiləsi üçün möhkəm təməl yaradır".

O, gömrük orqanlarının fəaliyyətinə də toxunub və rəqəmsal texnologiyaların tətbiqinin sənədlərin rəsmiləşdirilməsi vaxtını əhəmiyyətli dərəcədə azaltdığını vurğulayıb.

Mavlonovun sözlərinə görə, 2020-2025-ci illərdə xarici ticarət dövriyyəsi iki dəfə artıb, gömrük daxilolmaları isə 2025-ci ildə 76,2 trilyon suma (6,3 milyard dollar) çatıb. O vurğulayıb ki, rəqəmsal həllərin tətbiqi bəyannamələrin rəsmiləşdirilməsinə cəlb edilmiş əməkdaşların sayını 40 % azaltmağa imkan verib və eyni zamanda nəzarətin, habelə əlavə ödənişlərin tutulmasının səmərəliliyini bir neçə dəfə artırıb.

O, həmçinin risk əsaslı modelə keçid nəticəsində yoxlamaların sayının 20 % azaldığını və onların səmərəliliyinin 10 dəfədən çox artdığını qeyd edib.

Onun sözlərinə görə, sistemdə 176 rəqəmsal həll tətbiq edilib, bəyannamələrin avtomatik rəsmiləşdirilməsi və "Üç addımda ixrac" sisteminin istifadəyə verilməsi isə intellektual gömrüyə keçidin əsas mərhələsi olub, prosesləri əhəmiyyətli dərəcədə sürətləndirib və insan amilinin təsirini azaldıb.

O vurğulayıb ki, rəqəmsallaşdırma məsafədən idarəetmə həllərinin tətbiqi və aviaşirkətlərlə məlumat mübadiləsinin genişləndirilməsi hesabına aeroportlarda gömrük nəzarəti vaxtını nəzərəçarpacaq dərəcədə azaltmağa imkan verib.

Oxşar xəbərlər

Azərbaycan-Özbəkistan Ekspert Şurası yaradılıb

Özbəkistan Prezidenti: Mərkəzi Asiya ölkələri Azərbaycanla səmərəli əməkdaşlıq edir

Bakı və Daşkənd arasında əməkdaşlıq regionda tarixi hadisələr fonunda inkişaf edir

Mirziyoyev: Azərbaycan Mərkəzi Asiya və Avropa arasında strateji körpü rolunu oynayır

Özbəkistan XİN-in rəsmisi: Azərbaycanla münasibətlər bütün istiqamətlərdə davamlı artım nümayiş etdirir