Ötən ilin yanvar-noyabr aylarında Azərbaycandan Türkiyəyə ümumilikdə 10 milyard 441,03 milyon kubmetr təbii qaz ixrac edilib.

“Report” xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, 2023-cü ilin ilk 11 ayı ilə müqayisədə 12,3 % çoxdur.

Ötən ilin noyabr ayında Azərbaycan Türkiyəyə 970,16 milyon kubmetr təbii qaz ixrac edib. Bu, 2023-cü ilin noyabr ayı ilə müqayisədə 41,44 % çoxdur.

Bununla da noyabrda Azərbaycan Türkiyəyə təbii qaz ixrac edən ikinci ölkə olub. Türkiyənin ümumilikdə idxal etdiyi təbii qazın 16,7 %-i Azərbaycanın payına düşüb.

Xatırladaq ki, 2023-cü ilin noyabr ayında Türkiyə Azərbaycandan 685,89 milyon kubmetr təbii qaz idxal edib.

Ümumilikdə isə noyabrda Türkiyə ümumilikdə 5 milyard 806,26 milyon kubmetr həcmində təbii qaz idxal edib ki, bu da 2023-cü ilin eyni ayının göstəricisi ilə müqayisədə 30,95 % çoxdur.

Noyabrda Türkiyəyə qaz ixracına görə ilk yeri Rusiya tutub. İlin 11-cu ayında Rusiyadan Türkiyəyə 2 milyard 728,67 milyon kubmetr təbii qaz ixrac olunub. Bu, 2023-cü ilin noyabr ayı ilə müqayisədə 18,48 % çoxdur.

Noyabrda üçüncü yerdə İran qərarlaşıb. Bu ölkə həmin ay Türkiyəyə 853,82 milyon kubmetr qaz nəql edib. 2023-cü ilin noyabr ayı ilə müqayisədə İrandan Türkiyəyə qaz nəqli 25,09 % artıb.

Qeyd edək ki, Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.

Oxşar xəbərlər

Azərbaycan Türkiyəyə qaz nəqlini 10 % artırıb

Azərbaycan Türkiyəyə qaz nəqlini 10 %-dən çox artırıb

Azərbaycan mayda Türkiyəyə qaz ixracı üzrə liderliyini qoruyub

Azərbaycan iyunda Türkiyəyə qaz ixracı üzrə liderliyini qoruyub

Azərbaycan 11 ayda 23 milyard kubmetrdən çox təbii qaz ixrac edib