“Ulduz” jurnalının baş redaktoru, şair-yazıçı Qulu Ağsəsin “Saat 6-nı gözləyirəm” kitabının təqdimat mərasimi keçirilib.

APA-nın xəbərinə görə, təqdimat mərasimində çıxış edən Qulu Ağsəs bildirib ki, kitabın adı 2020-ci il Vətən müharibəsi dövründə yaşanan hisslərdən qaynaqlanır.

O, həmin günlərdə hər zaman səhər saat 6-da qələbə xəbəri eşidəcəyimizə inandığını, bunu tez-tez dilə gətirdiyini və məhz buna görə də kitabı “Saat 6-nı gözləyirəm” adlandırdığını vurğulayıb.

Müəllifin sözlərinə görə, kitabda Azərbaycan mədəniyyəti, ədəbiyyatı və tanınmış şəxsiyyətlər haqqında esselər yer alıb və nəşr müxtəlif mövzuları əhatə edən kiçik həcmli yazılardan ibarətdir.

Xalq yazıçısı Çingiz Abdullayev bu kitabın çoxsaylı oxucular tərəfindən maraqla qarşılanacağına inandığını deyib.

Milli Məclisin deputatı, yazıçı Aqil Abbas bildirib ki, Qulu Ağsəs peşəkar redaktor olmaqla yanaşı, yüksək insani keyfiyyətlərə malikdir.

Tədbirdə çıxış edən professor Sevinc Əliyeva kitabda Azərbaycan dilinin ifadə imkanları, rəngarəngliyi və bədii gücünün aydın şəkildə əks olunduğunu diqqətə çatdırıb. O, həmçinin, Qulu Ağsəsin şeirlərinə məktəb dərsliklərində də yer verilməsinin məqsədəuyğun olacağını bildirib.

Tədbirdə çıxış edənlər müəllifə yeni yaradıcılıq uğurları arzulayıb, kitabın geniş oxucu auditoriyası qazanacağına əminliklərini ifadə ediblər.

Oxşar xəbərlər

Bahəddin Həzinin “Göyün cazibə qüvvəsi” kitabının təqdimatı olub

Türkiyənin "Gənc ürəklər" jurnalının Azərbaycan ədəbiyyatına həsr edilmiş buraxılışının təqdimatı keçirilib

Vaqif Poeziya Günləri çərçivəsində poeziya saatı keçirilib - FOTO

Əlcəzairdə Qarabağ müharibəsi və Prezident İlham Əliyevin şəxsiyyət faktoru müzakirə edilib

“İRS” silsiləsi çərçivəsində nəşr edilən “Daşları toplamaq vaxtıdır” adlı kitabın təqdimatı keçirilib