Bakıda "Türk mətbəxi həftəsi" ilə əlaqədar tədbir keçirilib - FOTO

Bakıda Türkiyədə və bütövlükdə dünyada hər il 21 - 27 may tarixləri arasında qeyd olunan "Türk mətbəxi həftəsi" ilə əlaqədar tədbir keçirilib.

APA xəbər verir ki, tədbirdə Türkiyənin Azərbaycandakı səfiri Birol Akgün, səfirliyin nümayəndələri, eləcə də bir sıra digər qonaqlar iştirak edib.

Səfir Birol Akgün qonaqları salamlayaraq, "Türk mətbəxi həftəsi"nin uzun illərdir geniş arealda qeyd edildiyini diqqətə çatdırıb.

O bildirib ki, bu günlər ərzində keçirilən tədbirlərdə qonaqlara Türk mətbəxinin müxtəlif ləziz təamları təqdim edilir:

"Bugünkü tədbirinizdə müxtəlif ölkələrin diplomatik təmsilçiləri də iştirak edir. İnanıram ki, tədbirimizə dəvət olunan qonaqlar ləziz yeməklərdən dadaraq, bəyənəcəklər. Hər birinizi bu tədbirdən zövq almağa dəvət edirəm".

Qeyd edək ki, Türk mətbəxi həftəsi hər il Azərbaycan da daxil olmaqla, dünyanın müxtəlif ölkələrində qeyd olunur.

Bunda əsas məqsəd Türk kulinariya incilərini daha geniş ictimaiyyətə təqdim etmək, eləcə də fərqli mədəniyyət və adət-ənənələrə malik insanları Türk Mədəniyyətinin çətiri altında birləşdirmək, xüsusilə də Türk qonaqpərvərliyini müxtəlif ölkələrdə tanıtmaqdan ibarətdir.