Bu gündən avqustun 8-dək Türkmənistanın Avaza Milli Turizm Zonasında keçirilən BMT-nin Dənizə Çıxışı Olmayan İnkişaf Etməkdə Olan Ölkələr üzrə III Konfransı çərçivəsində “Azərbaycan Milli Günləri” təşkil olunur.

Bu barədə "Report"a Mədəniyyət Nazirliyindən məlumat verilib.

Bildirilib ki, tədbirlər Azərbaycanın zəngin mədəniyyətini, tarixi irsini və incəsənət ənənələrini beynəlxalq auditoriyaya təqdim edir. Azərbaycan pavilyonu konfrans məkanında ziyarətçilərə açıq olacaq. Burada ölkənin tarixi və mədəni irsinə dair kitablar, broşürlər, suvenirlər, xalçalar, kəlağayılar və tətbiqi sənət nümunələri sərgilənəcək.

Ziyarətçilər qədim sənətkarlıq ənənələrini əks etdirən əl işləri ilə də tanış ola biləcəklər. Açıq havada təşkil olunan “Azərbaycanın milli irsinin inciləri” adlı incəsənət sərgisində Azərbaycan Milli Xalça Muzeyinin fondundan xalçalar, intarsiya, şəbəkə, zərgərlik, təkəlduz və kəlağayı nümunələri nümayiş olunacaq. Həmçinin, xalçatoxuma, şəbəkə sənəti, zərgərlik və kəlağayı hazırlanması üzrə ustad dərsləri keçiriləcək.

Sərgi zonasının kulinariya bölməsində milli mətbəxin ənənəvi yeməkləri və şirniyyatları təqdim olunacaq, Azərbaycanın qonaqpərvərliyi və kulinariya ənənələri nümayiş etdiriləcək.

Bu gün konfransın açılış mərasimi çərçivəsində qala-konsert təşkil ediləcək.

6 avqustda “Azərbaycan Milli Günü” münasibətilə konsert proqramı, 8 avqustda isə Azərbaycan incəsənət ustalarının iştirakı ilə yekun qala-konsert baş tutacaq.

Oxşar xəbərlər

Türkmənistanda beynəlxalq konfransda “Azərbaycan Milli Günü” keçiriləcək

Türkiyədə Azərbaycan Mədəniyyəti Günləri təşkil ediləcək

Bişkekdə ənənəvi Azərbaycan əl işlərinin sərgisi keçiriləcək

Berdiməhəmmədovun qızı Azərbaycan Milli Xalça Muzeyi ilə tanış olub

Şimali Makedoniya Prezidenti Xalça Muzeyi ilə tanış olub