Azərbaycan ölkədə daşınmaz əmlak obyektləri alan əcnəbilərə uzunmüddətli vizalar təqdim etməlidir.

"Report" xəbər verir ki, bunu "PASHA Holding" MMC-nin baş icraçı direktoru Cəlal Qasımov Bakıda İslam İnkişaf Bankı (IsDB) Qrupunun illik toplantıları çərçivəsində keçirilən Azərbaycanın investisiya perspektivlərinə həsr olunmuş forumda çıxış edərkən bildirib.

"Bu gün biz müşahidə edirik ki, brendləşdirilmiş layihələrimizdə xarici investorların payı eyni sinifdən olan, lakin brendləşdirilməmiş obyektlərdəki bənzər göstəricini əhəmiyyətli dərəcədə üstələyir. Bu xarici investorlar, əgər açıq danışsaq və mənzərəyə daha geniş kontekstdə baxsaq - biz bu məsələni hökumətlə də müzakirə etmişik - daşınmaz əmlak seqmentində nə qədər çox premium səviyyəli layihə həyata keçirilirsə, onlarda idxal materiallarının payı bir o qədər artır. İqtisadi baxımdan bu, idxalın həcminin artması səbəbindən heç də həmişə müsbət hal deyil. İşçi qüvvəsinin xərcləri developmentin ümumi dəyərində getdikcə daha az pay tutmağa başlayır. Şərti olaraq, siz daha bahalı mərmər və digər materiallar almaq məcburiyyətində qalırsınız. Məhz buna görə də xarici investisiyaları cəlb etmək son dərəcə vacibdir, əks halda kapital axını baş verəcək", - C.Qasımov vurğulayıb.

O qeyd edib ki, xarici investorların cəlb edilməsi üçün brendləşdirilmiş rezidensiyalar iki əsas şərtdən yalnız biridir:

"Məsələn, viza rejimi məsələsi. Bu sistemin Dubayda necə fəaliyyət göstərdiyi hər kəsə yaxşı məlumdur. Siz daşınmaz əmlak alırsınız və 10 illik viza əldə edirsiniz. Azərbaycan da daşınmaz əmlak alışına investisiya yatıranlara uzunmüddətli vizalar təqdim etməlidir. Onlar üçün investisiya prosedurunu sadələşdirməli, əlverişli şərait formalaşdırmalıyıq. Məhz bu məsələ hazırda hökumətlə dialoqumuzun mərkəzində dayanır. Müəyyən bir dövlət agentliyinin nəzdində mənzillərin könüllü reyestrini yaratmaq məqsədəuyğundur. Belə ki, mən əcnəbi alıcı olaraq mənzil aldıqda onun mənim adıma qeydiyyata alındığına tam əmin olum. Sonradan isə ondan bank sahəsində girov təminatı kimi istifadə etmək və sair mümkün olsun. Beləliklə, savadlı yanaşma ilə bütün iqtisadiyyata yayılacaq bir sinergetik effekt yaranacaq. Ancaq biz bunu təkbaşına həyata keçirmək iqtidarında deyilik. Bu, hökumətlə birlikdə həyata keçirilməlidir və məhz bu cür müzakirələri biz hazırda fəal şəkildə aparırıq".

Oxşar xəbərlər

Cəlal Qasımov: Əmlak sektoru yalnız tikinti deyil, “həyat tərzi” konsepsiyası üzərində qurulmalıdır

Azərbaycanda daşınmaz əmlaka əsaslanan fondların yaradılması təklif olunur

Aysel Yaqubova: "Regional əməkdaşlıq Azərbaycanın enerji keçidinin əsas amilidir"

Nazir: "Azərbaycan rəqəmsal transformasiyanı sürətləndirir"

BFB: İnstitusional investorlar uzunmüddətli istiqrazlara investisiya qoymur