“Mənzil bir çox sistemlərin kəsişmə nöqtəsidir”.

Sizinxeber.az xəbər verir ki, bunu UN-Habitatın icraçı direktoru Anaklaudia Rossbax Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində baş tutan panel müzakirəsində bildirib.

Onun sözlərinə görə, mənzil siyasətinə yalnız sosial ölçüdən yanaşmaq düzgün deyil, çünki burada ekoloji, şəhərsalma və torpaq idarəçiliyi kimi mühüm amillər də rol oynayır: “Mənzil bir çox müxtəlif sistemlərin kəsişmə nöqtəsində yerləşir. Mənzilə sosial perspektivdən baxmaq olar, amma burada ekoloji ölçü də var. Harada və necə tikinti aparıldığına diqqət yetirilməlidir”.

BMT rəsmisi vurğulayıb ki, şəhər planlaşdırılması və urban sistemlərin düzgün işləməsi də mənzil siyasətinin ayrılmaz hissəsidir: “Şəhər planlarının və sistemlərinin mənzil üçün necə işlədiyi vacibdir. Məsələn, torpaq məsələsi kritik əhəmiyyət daşıyır”.

Rossbax qeyd edib ki, belə genişmiqyaslı və kompleks məsələlərin uğurlu həlli üçün yüksək siyasi iradə və liderlik əsas şərtlərdən biridir: “Bizə ən yüksək səviyyəli liderlik lazımdır. Əgər bu yoxdursa, məqsədlərə nail olmaq mümkün deyil.”

O, tarixi təcrübələrə diqqət çəkərək bildirib ki, cəmiyyətlərin yoxsulluqdan çıxması, müharibə və böhranlardan bərpası prosesində mənzil siyasəti əsas başlanğıc nöqtələrindən biri olub: “Tarixə baxsaq, görərik ki, böyük əhali qruplarının yoxsulluqdan çıxarıldığı, yaxud böyük münaqişə və böhranlardan sonra bərpanın həyata keçirildiyi dövrlərdə mənzil əsas giriş nöqtəsi olub”.

O, xüsusilə müharibədən sonrakı Avropa nümunəsini xatırladaraq mənzil siyasətinin sosial və iqtisadi sabitliyin bərpasında mühüm rol oynadığını vurğulayıb.

Oxşar xəbərlər

Nazir: Anqola dayanıqlı şəhər inkişafı üçün mənzil proqramlarını genişləndirir

Anar Quliyev: WUF13-ə ev sahibliyi Azərbaycan üçün böyük şərəf və ciddi məsuliyyətdir

Kanada rəsmisi: Şəhər problemləri hökumətlərin həll imkanlarını üstələyir

UN-Habitat: Mənzil siyasəti yoxsulluğu azaltmaqda əsas rol oynayır

Malayziya 10 ildə 1 milyon əlverişli və inklüziv mənzil tikməyi planlaşdırır