Ermənistanın İstintaq Komitəsi Samvel Karapetyanın "Güclü Ermənistan" Partiyasının tərəfdarları ilə hüquq-mühafizə orqanlarının əməkdaşları arasında İrəvanda Korrupsiyaya Qarşı Mübarizə Məhkəməsinin qarşısında baş verən dava ilə əlaqədar qrup şəklində xuliqanlıq maddəsi ilə cinayət işi açıb.

"Report"un məlumatına görə, bu barədə İstintaq Komitəsinin mətbuat katibi Kima Avdalyan feysbukda bildirib.

"Bu gün "Güclü Ermənistan" Partiyasının tərəfdarlarının iştirakı ilə Korrupsiyaya Qarşı Mübarizə Məhkəməsinin qarşısında baş verən hadisə ilə əlaqədar olaraq qrup xuliqanlığı və vəzifəli şəxsin qanuni vəzifələrinə mane olma maddələri ilə cinayət işi açılıb. İlkin istintaq zamanı on yeddi nəfər saxlanılıb", - o yazıb.

Xatırladaq ki, bir gün əvvəl Ermənistanın Korrupsiyaya Qarşı Mübarizə Məhkəməsi Karapetyanın ev dustaqlığını daha üç ay uzadıb. O, 19 yanvar 2026-cı ildən ev dustaqlığındadır.

İş adamı 18 iyun 2025-ci ildə hakimiyyəti ələ keçirməyə çağırış ittihamı ilə həbs edilib. Oktyabrın 13-də ona qarşı irəli sürülən ittihamlar xidməti və ya rəsmi səlahiyyətlərdən və ya onlara əsaslanan təsirdən istifadə etməklə külli miqdarda çirkli pulların yuyulması ittihamları ilə tamamlanıb.

Fevral ayında Karapetyanın namizədliyi özünün təsis etdiyi "Güclü Ermənistan" Partiyası tərəfindən 7 iyunda keçiriləcək parlament seçkilərində Ermənistanın baş naziri vəzifəsinə irəli sürülüb.

Oxşar xəbərlər

Ermənistanda Karapetyanın tərəfdarlarının quldurluğu faktı üzrə cinayət işi başlayıb

Samvel Karapetyanın ev dustaqlığı 3 ay uzadılıb

Ermənistanda hakimiyyəti tənqid edən publisistə qarşı cinayət işi açılıb

KİV: Ermənistanın maliyyə nazirinə qarşı cinayət işi başladıla bilər