Bəhreyn səhər saatlarında krallığın ərazisinə İranın pilotsuz uçuş aparatları (PUA) ilə hücumunu pisləyərək, Tehranın ölkənin suverenliyini və öz beynəlxalq öhdəliklərini pozduğunu bildirib.

"Report" xəbər verir ki, müvafiq bəyanatı Bəhreynin Xarici İşlər Nazirliyi (XİN) yayıb.

Bildirilib ki, iyunun 27-si səhər saatlarında ölkə ərazisi bir neçə İran PUA-sının hücumuna məruz qalıb. XİN baş verənləri Bəhreynin suverenliyinin kobud şəkildə pozulması, vətəndaşların təhlükəsizliyinə təhdid və beynəlxalq hüququn pozulması adlandırıb.

Nazirlikdən qeyd edilib ki, İranın regionda və beynəlxalq səviyyədə gərginliyin azaldılmasına yönəlmiş səylər fonunda davam edən hərəkətləri dinc təşəbbüslərin pozulmasına görə bütün məsuliyyəti Tehranın üzərinə qoyur və ölkənin regionda vəziyyətin sabitliyini pozmağa yönəlmiş kurs yürütməsindən xəbər verir.

Bəhreyn həmçinin xatırladıb ki, İran 2026-cı il iyunun 17-də imzalanmış İslamabad Anlaşma Memorandumuna uyğun olaraq hərbi əməliyyatları dayandırmaq və region dövlətlərinin suverenliyinə hörmət etmək öhdəliyini götürüb. Manamanın fikrincə, hazırkı hücum Tehranın beynəlxalq ictimaiyyət qarşısında öz öhdəliklərinə məhəl qoymadığını göstərir.

Bundan əlavə, XİN Fars Körfəzi Ərəb Dövlətlərinin Əməkdaşlıq Şurası ölkələri və İordaniya adından Bəhreyn tərəfindən irəli sürülmüş və 136 dövlət tərəfindən dəstəklənmiş BMT Təhlükəsizlik Şurasının 2817 (2026) saylı qətnaməsinə istinad edib.

Sonda Bəhreyn beynəlxalq hüquqa uyğun olaraq öz suverenliyini və təhlükəsizliyini qorumaq hüququnu özündə saxladığını bəyan edib və BMT Təhlükəsizlik Şurasını öz qətnaməsinin icrasını təmin etməyə və təqsirkarları məsuliyyətə cəlb etməyə çağırıb.

Oxşar xəbərlər

Bəhreyn XİN İranın hücumları barədə: Təhlükəsizlik raketlər və PUA-larla əldə edilmir

BƏƏ İranın Bəhreyn, Küveyt və İordaniyaya yeni raket və PUA hücumlarını pisləyib

Rusiya XİN ABŞ-nin İrandakı nüvə obyektlərinə hücumunu pisləyib

Bəhreyn XİN: İran ötən gecə hücumlarda ərazimizi hədəfə alıb

Doha İranın hücumları fonunda Bakı və Yaxın Şərq ölkələri ilə həmrəyliyini ifadə edib