KİV: Yaponiya Baş naziri NATO sammitində iştirak etməyəcək

Yaponiya Baş naziri Siqeru İsibanın əvvəlcədən planlaşdırmasına baxmayaraq, Haaqada keçiriləcək NATO sammitində iştirak etməyəcəyi gözlənilir.

Sizinxeber.az xəbər verir ki, bu barədə Kyodo agentliyi məlumatlı mənbələrə istinadla xəbər verir.

Səfərin ləğv olunmasının səbəbi rəsmi şəkildə açıqlanmayıb.

Bundan əvvəl Cənubi Koreya Prezidenti Li Çje Myonq da sammitdə iştirakdan imtina etmişdi. Onun administrasiyası bu qərarı inauqurasiyadan sonra ölkə daxilindəki çoxsaylı dövlət işləri və Yaxın Şərqdəki dəyişkən vəziyyətlə izah etmişdi.

Yaponiya Baş nazirinin NATO sammitlərində iştirakı son illərdə müntəzəm xarakter daşıyırdı və bu, Asiya-Sakit okean regionunda artan geosiyasi gərginlik fonunda Tokio ilə alyans arasında yaxınlaşma kursunu əks etdirirdi.