Azərbaycan Basketbol Federasiyasının (ABF) baş katibi Vüqar Əzimov 3x3 basketbol üzrə Dünya Qadın Seriyasının Bakı mərhələsi ilə bağlı fikirlərini bölüşüb.

ABF rəsmisi bu barədə "Report"a açıqlama verib.

O, artıq üçüncü ildir turnirin Bakıda təşkil edildiyini xatırladıb:

"Ölkəmizə gələn komandalar hər zaman təşkilatçılıqdan məmnun qalıblar. Azərbaycanda beynəlxalq yarışlar həmişə yüksək səviyyədə təşkil olunur. "Sea Breeze" rəhbərliyinə ev sahibliyi etdikləri üçün və yardılan şəraitə görə təşəkkür edirik. Bu il Sumqayıt və Quba şəhərlərində də Dünya Qadın Seriyasının mərhələləri olacaq".

ABF rəsmisi Azərbaycan yığmasının turnirdəki çıxışı ilə bağlı danışıb:

"Millimizin qrupdan çıxması və 1/4 finala vəsiqə qazanması sevindirici haldır. Oyunçularımız əllərindən gələni etdilər. Bu idman növündə hər şey anidən dəyişə bilər. Daha yaxşı nəticə əldə etmək istəyərdik. Amma Latviya dünya reytinqində liderlərdən hesab olunur. Qadın və kişilərdən ibarət 3x3 basketbol üzrə milli komandalarımız Avropa çempionatının seçmə mərhələsində iştirak edəcəklər. Bu yarışdan yaxşı nəticə ilə geri dönəcəklərinə ümid edirik".

Oxşar xəbərlər

3x3 basketbol üzrə Dünya Qadın Seriyasının Bakı mərhələsinə start verilir

Azərbaycan millisi 3x3 basketbol üzrə Dünya Qadın Seriyasının Bakı mərhələsində 1/4 finala yüksəlib

3x3 basketbol üzrə Dünya Qadın Seriyasının Bakı mərhələsi başlayır