Rüşvət müqabilində ədalətsiz qərar çıxarmaqda ittiham olunan sabiq hakim İlyas Mahmudov barəsində olan hökmdən kassasiya şikayəti verib.

APA xəbər verir ki, şikayətə Ali Məhkəmədə hakim İlqar Qılıcovun sədrliyi ilə gələn ilin fevral ayında baxılacaq.

Xatırladaq ki, Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilən iclasda İlyas Mahmudovun 9 il azadlıqdan məhrum edilməsi qərarı verilib.

Qeyd edək ki, 2008-2019-cu illərdə Sumqayıt Şəhər Məhkəməsinin hakimi işləmiş İlyas Mahmudov 2022-ci ildə Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilib.

İttihamda deyilir ki, İ.Mahmudov icraatında olan müxtəlif mülki işlər üzrə iddiaçıların tələblərinin təmin edilməsi barədə bilə-bilə ədalətsiz qətnamə qəbul etməsi müqabilində ayrı-ayrı şəxslərdən rüşvət qismində pul alıb, 2 halda ədalətsiz qətnamə çıxarıb. Bundan başqa, onun icraatında olan digər işlər üzrə qəbul etdiyi 25 qətnaməyə əvvəlcədən bilə-bilə yalan məlumatlar daxil edib, əmək stajı və əlilliyin müəyyən edilməsi ilə bağlı qanunsuz məhkəmə aktlarının aidiyyəti qurumlara təqdim edilməsinə nail olub. Hakimin bu hərəkətləri ilə də 243 min 441 manat pensiya ödənişinin verilməsinə səbəb olmaqla dövlətə zərər vurmasına dair əsaslı şübhələr müəyyən edilib. Ona qarşı Cinayət Məcəlləsinin 295.1 (bilə-bilə ədalətsiz hökm, qətnamə, qərardad və ya qərardad çıxarma), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham irəli sürülüb.

Oxşar xəbərlər

Prodüser Təranə Səmədova kassasiya şikayəti verib

Cəlilabad arxiv idarəsinin rüşvətə görə tutulan müdirinin cəzası azaldılıb

Məhkəmə rüşvətə görə tutulan icra nümayəndəsi barədə qərar verib

Abşeron RİH-in sabiq əməkdaşının məhkəməsi başlayır

Külli miqdarda mənimsəmədə ittiham olunan “SOCAR-AQŞ”nin sabiq baş direktorunun məhkəməsi başlayıb