“Euronews” telekanalının “Focus” verilişində Bakıda keçirilən XII Qlobal Bakı Forumuna həsr olunan reportaj yayımlanıb.

APA xəbər verir ki, kanalın rəsmi portalında dərc edilən reportajda “Dünya düzəninin yenidən düşünülməsi: Çağırışların fürsətə çevrilməsi” şüarı ilə keçirilən bu nüfuzlu tədbirin qlobal çağırışların dəyərləndirilməsi üçün geniş imkanlar açdığı, məhz bu məqsədlə iştirakçı ölkələrin siyasi xadimlərini və səlahiyyətli şəxslərini görüşdürdüyü vurğulanıb.

Videomaterialda forumun müzakirə mövzuları da dəyərləndirilib. Qeyd olunub ki, iştirakçılar Cənubi Qafqaz regionunda təhlükəsizlik, Avropa İttifaqının genişləndirilməsi, iştirakçı ölkələr arasında yeni əməkdaşlıq imkanları və digər məsələlər ilə bağlı geniş fakir mübadiləsi aparıblar.

Reportajda Azərbaycan Prezidenti İlham Əliyevin müsahibəsindən görüntülər də təqdim olunub. Burada isə Prezident İlham Əliyev Cənubi Qafqaz təhlükəsizlik mexanizminin yaradılmasının önəmini ifadə edir.

Müəllif Prezident İlham Əliyevin bu istiqamətdəki fikirlərini də tamaşaçılara təqdim edib:

“Əlbəttə, ətrafımızda baş verən böhranlardan regionumuzun qorunması vacib məsələdir. Təəssüflər ki, onilliklər ərzində Cənubi Qafqaz qarşıdurma və düşmənçilik bölgəsi olub. Hazırda nisbətən sakit dövrdəyik və biz diqqətimizi buna yönəltməliyik. Biz növbəti hərbi qarşıdurmanı istisna edəcək əhatəli təhlükəsizlik mexanizmləri yaratmalıyıq və sovet dövründə olduğu kimi qonşuluq şəraitində yaşamağa çalışmalıyıq".

Oxşar xəbərlər

Şimali Makedoniya Prezidenti: Qütbləşmə dünyada təhlükəsizliyi sarsıdır

Jelka Tsviyanoviç: Qlobal Bakı Forumu problemlərimizi səsləndirmək üçün platformadır

İsmail Seragəldin: Qlobal Bakı Forumu hər zaman rasional arqumentlərin irəli sürülməsi ilə yadda qalıb

BMT-nin Cenevrədəki ofisinin baş direktoru: Biz daha inklüziv dünya qura bilərik