Bu gün Yaponiyanın Azərbaycandakı səfirliyi tərəfindən Bakıda Yaponiya İmperatoru Naruhitonun doğum gününə həsr edilmiş ziyafət təşkil olunub.

Sizinxeber.az xəbər verir ki, hər iki ölkənin Dövlət himnləri səsləndirildikdən sonra Yaponiyanın Azərbaycandakı fövqəladə və səlahiyyətli səfiri Katsuya Vatanabe çıxış edib.

Səfir Katsuya Vatanabe keçən il Qazaxıstanın Aktau şəhəri yaxınlığında "Azərbaycan Hava Yolları" şirkətinə məxsus təyyarənin qəzaya uğraması ilə bağlı başsağlığı verib: “Təyyarənin qəzaya uğraması nəticəsində çoxsaylı insan təlafatına görə dərin hüznlə başsağlığı verirəm. Yaralıların tezliklə sağalması üçün dua edirəm. Bu çətin günlərdə də biz hər zaman dostlarımızın yanındayıq”.

Səfir, ötən il Azərbaycanda keçirilən COP29 tədbirinin uğurla təşkil olunmasından məmnunluğunu ifadə edərək, bu tədbirin yaşıl cəmiyyətin qurulmasına doğru atılan mühüm bir addım olduğunu vurğulayıb.

Diplomat ölkələrimiz arasında sıx diplomatik əlaqələrdən məmnunluğunu bildirib. Qeyd olunub ki, Azərbaycan və Yaponiya arasındakı dostluq münasibətlərinə ümumi nəzər yetirdikdə, 1992-ci ildə diplomatik münasibətlərin qurulmasından bəri ötən 30 ildən artıq müddətdə siyasət, iqtisadiyyat, mədəniyyət, təhsil və bir çox digər sahələrin inkişaf etdiyini görə bilərik.

Xarici işlər nazirinin müavini Elnur Məmmədov Azərbaycanın, Yaponiya ilə münasibətlərə əhəmiyyət verdiyini bildirib: “Ölkələrimiz arasında əməkdaşlıq müxtəlif sahələrdə uğurla inkişaf edir. Ötən illər ərzində Azərbaycanla Yaponiya arasında dostluq münasibətləri dinamik inkişaf yolu keçmiş, əməkdaşlığımız iqtisadiyyat, enerji, investisiya, humanitar və qarşılıqlı maraq doğuran digər sahələrdə genişlənmişdir”.

“Biz, həmçinin əməkdaşlığımızın mühüm istiqamətlərindən biri olan enerji sektorunda fəal əməkdaşlığımızı yüksək qiymətləndiririk. Qeyd edim ki, biz Qarabağ və Şərqi Zəngəzur iqtisadi rayonlarında Yaponiya şirkətləri ilə “ağıllı şəhər” və “ağıllı kənd”, eləcə də “Yaşıl enerji zonaları” konsepsiyalarının həyata keçirilməsi istiqamətində əməkdaşlıq edirik.

Azərbaycanla Yaponiya arasında əməkdaşlıq təkcə ikitərəfli səviyyə ilə məhdudlaşmır. Yaponiya və Azərbaycan beynəlxalq təşkilatlar və tədbirlər çərçivəsində sıx əməkdaşlıq edir”, - deyə nazir müavini vurğulayıb.

Oxşar xəbərlər

Səfir: Azərbaycan Yaponiya üçün vacib tərəfdaş ölkədir

TDT Aktauda AZAL-ın təyyarəsinin qəzaya uğraması ilə bağlı başsağlığı verib

İsrail təyyarənin qəzaya uğraması ilə əlaqədar Azərbaycana yardım göstərməyə hazırdır

Milorad Dodik Prezident İlham Əliyevə başsağlığı verib

Türkmənistanın Prezidenti Sərdar Berdiməhəmmədov Prezident İlham Əliyevə başsağlığı verib