İrəvanda keçiriləcək Avropa Siyasi Birliyinin sammiti parlament seçkiləri öncəsi Baş nazir Nikol Paşinyanın mövqeyini gücləndirmək üçün hazırlanmış seçki alətidir. Moskva isə Qərbin və regional oyunçuların Ermənistanın daxili siyasətinə müdaxiləsini ölkənin ləyaqətinin aşağılanması kimi görür.

Axar.az xəbər verir ki, bu sözləri MDBMİ-nun (Moskva Dövlət Beynəlxalq Münasibətlər İnstitutu) Beynəlxalq Araşdırmalar İnstitutunun aparıcı tədqiqatçısı Nikolay Silayev erməni mediasına müsahibəsində deyib.

Silayevin sözlərinə görə, sammitin Ermənistanda keçirilməsi Avropa liderlərinə heç nə vermir, bu, Paşinyana hesablanmış kampaniya hədiyyəsi kimi xidmət edir:

“AB-nin Ermənistan baş nazirinə aktiv dəstəyi Moskva üçün gözlənilməz deyil. 2022-ci ilin oktyabr ayı Ermənistanın Rusiyadan uzaqlaşmasında ən həlledici addımdır. O zaman Paşinyan Avropa Birliyinin təzyiqi altında Qarabağı Azərbaycan ərazisi kimi tanıdı və otuz ildən çox davam edən danışıqların əsasını təşkil edən mübahisəli status mübahisəsindən faktiki olaraq imtina etdi”.

Silayev bildirib ki, əgər Paşinyan seçkilərdə qalib gələrsə, biz onunla əməkdaşlıq etməliyik:

“Başqa nə edə bilərik? Amma Ermənistan Rusiya ilə son bağlantıları qırmaq kursunu tutsa, yəni AB-yə üzv olmaq istiqamətində irəliləsə, nəticələrinə görə tam məsuliyyəti Ermənistan hakimiyyəti daşıyacaq”.

Bununla bərabər, Silayev Ermənistanda “öz ölkəsinin maraqlarına zidd olaraq əlaqələri (Rusiya ilə - red.) kəsəcək bir hökumət yarana biləcəyini” də vurğulayıb.

Oxşar xəbərlər

Azərbaycan və Ermənistan Avropa Siyasi Birliyinin Sammitinin keçirilməsi üçün bir-birinin namizədliyini dəstəkləyib

Paşinyan: Ermənistanda növbədənkənar parlament seçkiləri keçirilməyəcək

Paşinyan Qarabağı Azərbaycanın bir hissəsi kimi gec tanıdığına təəssüf edib

Paşinyan AŞPA-da elan etdi: Ermənilər Qarabağa qayıda bilməz!