“AzInTelecom” MMC ödəniş ekosistemində “bulud” xidmətləri üzrə qlobal standartları müəyyən edən “PCI DSS Certificate of Compliance” sertifikatını əldə edib.

Bu barədə "APA-Economics"ə şirkətdən bildirilib.

Şirkət MDB məkanında “PCI DSS” sertifikatının 4.0.1 versiyasını əldə edən ilk “bulud” provayderi olub. Bununla da “AzInTelecom”a məxsus Bakı Əsas Data Mərkəzinin maliyyə qurumları üçün “bulud” xidmətləri göstərmə uyğunluğu təsdiqlənib. Artıq “AzInTelecom” həm “bulud”, həm də yerləşdirmə üzrə “PCI DSS” uyğunluq sertifikatına malikdir. Bu isə o deməkdir ki, maliyyə sahəsində fəaliyyət göstərən bütün qurumlar artıq “AzInTelecom”dan “bulud” xidməti əldə edə bilərlər.

Sertifikatın əldə olunması üçün əvvəlcə Azərbaycanda səlahiyyətli “Quality Veritas” şirkəti tərəfindən ilkin qiymətləndirilmə aparılıb, müstəqil auditorlar tərəfindən audit həyata keçirilib. Audit nəticəsində uyğunluq təsdiqlənib və “AzInTelecom” MMC-yə “PCI DSS Certificate of Compliance” sertifikatı təqdim edilib.

Qeyd edək ki, “PCI DSS” standartı 2006-cı ildə “Visa”, “MasterCard”, “American Express”, “Discover” və JCB kimi beynəlxalq ödəniş brendləri tərəfindən yaradılmış “PCI SSC” (Ödəniş Kartı Sənayesi Təhlükəsizlik Standartları Şurası) təşkilatı tərəfindən formalaşdırılıb. Təşkilatın məqsədi ödəniş kartı məlumatlarının mühafizəsi və ödəniş əməliyyatlarının təhlükəsizliyinin gücləndirilməsidir.

Hazırda “AzInTelecom” MMC iki müasir Data Mərkəz üzərindən 250-yə yaxın quruma “bulud” xidmətləri göstərir.

Oxşar xəbərlər

“AzInTelecom” MMC yeni “AzInCloud” platformasını istifadəyə verib

Azərbaycanda yaşıl texnologiyalar əsasında iki yeni data mərkəzi tikiləcək

Azərbaycan Turizm Bürosu İT sistemlərini “Hökumət buludu”na köçürüb

AİB Azərbaycanda ilk dəfə dövlət sektoruna kredit ayırıb

Elm və Təhsil Nazirliyinin İT resursları “Hökumət buludu”na köçürülüb