Məlum olduğu kimi, xarici dövlətlərin ali təhsilə aid kvalifikasiyalarının tanınması Azərbaycan Respublikası Prezidentinin 2023-cü il 18 avqust tarixli, 2306 nömrəli Fərmanı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları” (bundan sonra Qaydalar) əsasında Azərbaycan Respublikası Elm və Təhsil Nazirliyinin tabeliyində fəaliyyət göstərən Təhsildə Keyfiyyət Təminatı Agentliyi (TKTA) tərəfindən həyata keçirilir.

Bu barədə APA-ya Təhsildə Keyfiyyət Təminatı Agentliyindən verilən məlumatda deyilib.

Bildirilib ki, qaydaların 4-cü hissəsinə əsasən tanınma üçün təqdim olunan xarici ali təhsil sənədinin autentik (həqiqi) olması tanınmaya dair başlıca tələblərdəndir.

"Türkiyə Respublikasının Karabük Universiteti tərəfindən verildiyi iddia edilən bir qrup vətəndaşın 2021-2022-ci illərdə TKTA-ya təqdim etdiyi diplomların dövlət nümunəli olmadığı (saxta olduğu) aşkarlanıb və həmin diplomlar əsasında doqquz şəxsə təqdim edilmiş tanınmaya dair şəhadətnamələr qanunvericiliyə uyğun olaraq ləğv olunub", - deyə məlumatda bildirilib.

Oxşar xəbərlər

Diplomları tanınmayan və ən çox imtina alan universitetlərin siyahısı açıqlanıb

TKTA: Bəzi şəhadətnamələr saxtalaşdırılır

Agentlik xaricdə təhsil almaq istəyənlərə çağırış edib

Agentlik xaricdə onlayn təhsillə bağlı xəbərdarlıq edib

Xaricdə ali təhsil almış şəxslər üçün peşə tanınması üzrə imtahan keçirilib