Azərbaycanın Banqladeşə yeni təyin olunmuş qeyri-rezident səfiri Elçin Hüseynli oktyabrın 21-də bu ölkənin Prezidenti Məhəmməd Şahabuddinə etimadnaməsini təqdim edib.

“Report” xəbər verir ki, səfir bu barədə "X" sosial şəbəkəsindəki hesabında paylaşım edib.

“Ölkələrimiz ikitərəfli dostluq əlaqələri saxlayır. Beynəlxalq təşkilatlar çərçivəsində sıx əməkdaşlıq edir. Münasibətlərimizi daha da dərinləşdirmək üçün bu fürsəti əldə etməkdən şərəf duyuram”, - diplomat vurğulayıb.

Səfir digər paylaşımında bildirib ki, bu gün Banqladeşin ətraf mühitin mühafizəsi, meşə təsərrüfatı və iqlim dəyişikliyi nazirliyinin müşaviri (nazir vəzifəsini icra edən) və tanınmış ətraf mühit hüquqşünası Sayeda Rizvana Həsənlə görüşündə Bakıda keçiriləcək COP29 konfransını, o cümlədən iqlim dəyişikliyinin ən kəskin məsələlərini müzakirə edib.

Banqladeş KİV-i öz növbəsində məlumat verib ki, ölkə Prezidenti Məhəmməd Şahabuddin E.Hüseynlini qəbul edərkən bildirib ki, Banqladeş Azərbaycanla ticarət və investisiya da daxil olmaqla müxtəlif sahələrdə qarşılıqlı və çoxtərəfli münasibətlərin genişləndirilməsində maraqlıdır.

"M.Şahabuddin, həmçinin səfiri hazır geyim, dərman, keramika, dəri məmulatları da daxil olmaqla müxtəlif beynəlxalq keyfiyyətli malların idxalının artırılması, eləcə də Banqladeşdən ixtisaslı və yarımixtisaslı işçi qüvvəsinin cəlb edilməsi üzərində işləməyə çağırıb", - məlumatda qeyd edilib.

Oxşar xəbərlər

Azərbaycan səfiri Nepalın xarici işlər üzrə katibi ilə iki ölkə arasındakı münasibətləri müzakirə edib

Səfir: Belçika COP29-da yüksək səviyyədə təmsil olunacaq

Prezident İlham Əliyev Estoniyanın yeni səfirinin etimadnaməsini qəbul edib - YENİLƏNİB

COP29 sədrliyi nazirliklər nümayəndələrinin təyin olunmasını elan edib

Meksika COP29-da iştirak edəcək