Yuri Qusev: Kiyev və Bakı neft-qaz sahəsində əməkdaşlığın dərinləşdirilməsini müzakirə edirlər

Azərbaycan və Ukrayna neft-qaz sahəsində əməkdaşlığın dərinləşdirilməsi imkanlarını müzakirə edirlər.

"Sizinxeber.az" xəbər verir ki, bunu Ukraynanın Azərbaycandakı səfiri Yuri Qusev bildirib.

"Aydındır ki, neft və qaz hasil edən və Avropa enerji bazarında öz mövcudluğunu genişləndirən Azərbaycan, eyni zamanda Rusiya yanacağından imtina edən Ukrayna belə əməkdaşlığın dərinləşdirilməsində maraqlıdır", - səfir bildirib.

O, həmçinin Azərbaycanın Ukraynanın enerji təhlükəsizliyi məsələlərində göstərdiyi yardımın dəyərini vurğulayıb.

"Azərbaycan bizim enerji sistemimizin bərpası üçün enerji avadanlığı şəklində yardım göstərməyə davam edir", - Y.Qusev bildirib.

Diplomat vurğulayıb ki, Ukraynanın uzunmüddətli strateji tərəfdaşı olan Azərbaycan, Rusiyanın qoşunlarının Ukraynaya müdaxiləsindən sonra Kiyevə ardıcıl olaraq dəstək ifadə edib və göstərib.

"Ukrayna və Azərbaycan artıq çox illərdir strateji tərəfdaşlardır və bu tərəfdaşlıq dostluğa əsaslanan əhəmiyyətli tarixi köklərə malikdir", - səfir fikrini yekunlaşdırıb.