Milli Məclis cinayət işinin başlanmasının rədd edilməsi qaydalarına əlavələri ilk oxunuşda qəbul edib.

"Report" xəbər verir ki, bununla bağlı Milli Məclisin növbədənkənar sessiyasının bugünkü plenar iclasında Cinayət-Prosessual Məcəlləsində müvafiq dəyişiklik layihəsi müzakirəyə çıxarılıb.

Qeyd edilib ki, qanun layihəsinə əsasən, icraatında kommersiya mülki iş, və ya inzibati mübahisələr üzrə, yaxud inzibati xəta haqqında iş olan hakim, səlahiyyətli orqan (vəzifəli şəxs) həmin iş üzrə şəxsin əməllərində cinayətin əlamətlərini aşkar etdikdə bu barədə Mülki Prosessual Məcəllə və İnzibati Xətalar Məcəlləsinə uyğun olaraq qəbul etdiyi xüsusi qərardadı və ya məhkəmədə olan materialları ibtidai araşdırmaya prosessual rəhbərliyi həyata keçirən prokurora göndərəcək.

Sənəddə vurğulanıb ki, mövcud qanunvericiliyə əsasən, ibtidai araşdırmaya prosessual rəhbərliyi həyata keçirən prokuror və ya yuxarı prokuror göstərilən qərarı ləğv edir, 10 gündən artıq olmayan müddətdə əlavə yoxlama keçirilməklə və yaxud keçirilməməklə cinayət işinin başlanması haqqında qərar qəbul edir və onu ibtidai istintaqın aparılması üçün müstəntiqə göndərir, yaxud cinayət işinin başlanmasının rədd edilməsi haqqında çıxarılmış qərarı dəyişdirilmədən saxlayır.

Layihədə göndərilmiş xüsusi qərardad və ya materiallar üzrə cinayət işinin başlanmasının rədd edilməsi haqqında ləğv edilməmiş qərar olduqda həmin məsələ yuxarıda nəzərdə tutulmuş qaydada həll ediləcək.

Müzakirələrdən sonra qanun layihəsi səsverməyə qoyularaq birinci oxunuşda qəbul edilib.

Oxşar xəbərlər

Parlament hərbçilərin ictimai təhlükə törətməyən cinayətləri ilə bağlı dəyişikliyi ilk oxunuşda qəbul edib

MM bank kartlarının talanmasına görə şikayətlərə 24 saat ərzində baxılmasını son oxunuşda qəbul edib

MM bank kartlarının talanmasına görə şikayətlərə 24 saat ərzində baxılmasını ilk oxunuşda qəbul edib

Milli Məclisin iclası başlayıb, gündəlikdə 27 məsələ var

Milli Məclisin yaz sessiyasının sonuncu plenar iclasının gündəliyi açıqlanıb