Saxta araq, köhnə kolbasa – 200 manata bəzəkli toy menyusu

(Müəllif: İzzət Qurbanov)

Azərbaycanda toy sadəcə xoşbəxt gün deyil, həm də ictimai şou, ailələrin status yarışı və daha sonra danışılacaq süfrə tənqidlərinin əsas mövzusudur. Ən pisi isə budur: bu tənqidlər çox zaman toydan çıxandan sonra deyil, süfrəyə oturanda başlayır.

Son illərdə toy menyuları ucuzlaşmır – sadəcə keyfiyyətsizləşir. Gözəl masalar, par-parıldayan stollar, gül-çiçəkli bəzəklər... Və sonra: çürümüş kolbasa, soyuq "sulu" qutab və saxta araq. Gəlin real danışaq: artıq bəzi restoranlarda 200 manatlıq menyu kağız üzərində "lüks", masada isə təhlükəli görünür.

Bir neçə gün əvvəl iştirak etdiyim bir toyda masaya qoyulan "meze" boşqabı hələ giriş salatları gəlməmiş üfunət saçırdı. Qonaqlar bir-birinə baxır, amma heç kim demir. Çünki bu, toy sahibini “ayıb vəziyyətə” salmaq olar. Halbuki ayağına çağırdığın adamı pis məhsulla zəhərləmək daha böyük ayıbdır.

Toyun ortasında bir qonaq araq istədi. Gətirdilər. Etiketdə "Premium" yazılırdı, amma dadı 90-cı illərin zirzəmisindən gəlirdi. Bir-iki qurtumdan sonra "başım ağrıyır" deyib kənara çəkildi. Saxta içki, orijinal baş ağrısı – bu da bizim toy brendimiz.

Restoran sahiblərinə sual: Bu qiymətə bu qədər keyfiyyətsizlik hardandır?
Toy sahiblərinə sual: Siz niyə gözəl görünən, amma içi boş menyulara razılaşırsınız?
Qonaqlara sual: Niyə bu qədər susursunuz?

Bu susqunluq bizi buraya gətirdi. Bəzən toy süfrəsi sevinc yox, səbr imtahanına çevrilir. Əvvəlcə bəzəkli boşqablarla illüziya yaradılır, sonra boşluğun içində qalırıq. Elə bil “Instagram üçün çək, sonra yemə” konsepti. Halbuki toy, insanın ən xoş günü olmalıdır — özü də həm yaddaşda, həm mədədə yaxşı xatirə ilə qalmalıdır.

Mən İzzət Qurbanov olaraq düşünürəm ki, biz sadəcə toyu yox, zövqü, mədəniyyəti və vicdanı da təşkil etməyi öyrənməliyik. Keyfiyyətsiz məhsulla qonaq qarşılamaq mədəniyyət deyil. Bu, bəzən təhlükə, bəzən hörmətsizlik, bəzən də sadəcə biganəlikdir.

📣 Sonda bir təklif:
Əgər toyda masaya qoyduğun yeməyi özün yeyə bilməyəcəksənsə, o süfrəni açmağa heç ehtiyac yoxdur.