ITU: "Onlayn Azərbaycan" layihəsi rəqəmsallaşmanın dünya standartlarına uyğundur

"Onlayn Azərbaycan" layihəsi Beynəlxalq Telekommunikasiya İttifaqının (ITU) strateji məqsədlərinə tam uyğundur.

"Report" xəbər verir ki, bunu ITU-nun MDB üzrə regional direktoru Nataliya Moçu layihənin hesabat tədbirində bildirib.

"Bu layihə təkcə texnologiyaların inkişafına deyil, həm də Azərbaycanda insanların həyat keyfiyyətinin yüksəldilməsinə, onların sosial-iqtisadi rifahının artırılmasına və ölkənin daha da inkişafına kömək etmək məqsədi daşıyır. Onun əsas hədəfi ümumi rəqəmsal əlçatanlığın təmin edilməsi, keyfiyyətli, etibarlı və əlçatan informasiya-kommunikasiya texnologiyalarına (İKT) qoşulmaq üçün şəraitin yaradılmasıdır. Beynəlxalq Telekommunikasiya İttifaqı internetin universal, əlçatan və yüksək keyfiyyət standartlarına uyğun olması üçün bütün səylərini göstərir", - o qeyd edib.

N.Moçunun sözlərinə görə, daha bir prioritet telekommunikasiya və İKT-nin ədalətli, inklüziv istifadəsini təmin edən dayanıqlı rəqəmsal transformasiyadır: “Təqdim olunan videoda olduğu kimi, bu, insanların və cəmiyyətin potensialını açmağa imkan verir və dayanıqlı inkişaf üçün əsas yaradır”.