Ali Məhkəmə şəxsi həyatın toxunulmazlığı, şəxsi və ailə sirri hüquqları ilə bağlı mühüm qərarlar verəcək

“Yaxın zamanda Ali Məhkəmə tərəfindən vətəndaşların şəxsi həyatının toxunulmazlığı, şəxsi və ailə sirri kimi konstitusion hüquqlarının qorunması ilə bağlı mühüm qərarlar qəbul ediləcək”.

APA xəbər verir ki, bunu MEDİA-nın təşkilatçılığı ilə “İctimai proseslər media müstəvisində” mövzusunda Forumun açılış mərasimində Ali Məhkəmənin Mülki kollegiyasının sədri, Məhkəmə Hüquq Şurasının üzvü Sənan Hacıyev deyib.

O bildirib ki, media məkanında şəxslərin şərəf və ləyaqətinin müdafiəsi məsələlərinə müəyyən qədər diqqət ayrılsa da, təəssüf ki, vətəndaşların şəxsi həyatının toxunulmazlığı, şəxsi və ailə sirri kimi konstitusion hüquqlarının qorunması ilə bağlı vəziyyət heç də ürəkaçan deyil: “Belə ki, xüsusən televiziya verilişlərində bu hüquqlara qanunazidd müdaxilə adət halı alıb. Göstərilənlər nəzərə alınaraq, bu istiqamətdə müvafiq hüquqi tənzimləmənin həyata keçirilməsi məqsədi ilə yaxın zamanda Ali Məhkəmə tərəfindən mühüm qərarların qəbulu nəzərdə tutulub”.