Fövqəladə Hallar Nazirliyi və Bakı Şəhər Halqası Əməliyyat Şirkətinin birgə təşkilatçılığı ilə marşalların növbəti təlimi keçirilib.

Sizinxeber.az xəbər verir ki, təlimlərin keçirilməsində məqsəd Azərbaycanda keçiriləcək "Formula 1" yarışı zamanı mümkün fövqəladə halların idarə edilməsi, əməliyyat və qarşılıqlı fəaliyyət planları reallığının yoxlanılmasıdır.

Həmçinin təlimlər təhlükəli halların qarşısının alınması və yaranmış problemlərin çevik şəkildə həll edilməsi bacarıqlarının artırılmasına yönəlib.

Fövqəladə Hallar Nazirliyinin Əməliyyat Planlaşdırma Şöbəsinin rəisi polkovnik-leytenant Elvin Ağayev jurnalistlərə açıqlamasında bildirib ki, ümumilikdə 200 nəfər marşal var, onlardan 60 nəfəri Fövqəldə Hallar Nazirliyinin peşəkar yanğınsöndürənləridir.

Elvin Ağayev onu da qeyd edib ki, təlimlər bundan sonra da yarışlar başlayana qədər davam etdiriləcək. Təlimlərin keçirilməsində məqsəd yarışlar zamanı yanğın baş verərsə, qarşısının alınması, eləcə də marşalların bilik və bacarıqlarının artırılmasıdır. Şöbə rəisinin sözlərinə görə, təlimlər iki hissədən ibarətdir: “Nəzəri hissədə yanğın zamanı davranış və digər qaydalar, praktiki hissədə isə texniki avadanlıqla iş üzrə davranış izah olunur”.

Yanğınsöndürmə komandanlığının rəhbəri Vüsal Rüstəmov isə jurnalistlərə açıqlamasında təlimin məqsəd və istiqamətləri barədə məlumat verib: “Burada yanğınlar zamanı balonlarla davranış, onların istifadə olunması, yanğına yaxınlaşma texnikası və verilən komandaların icrası praktiki şəkildə göstərilir və icra olunur”.

Qeyd edək ki, iyul ayından başlayan təlimlər artıq 3-cü dəfədir keçirilir. Bundan sonra daha bir neçə təlimin keçirilməsi planlaşdırılır.

Xatırladaq ki, növbəti "Formula 1" Azərbaycan Qran Prisi bu ilin 19-21 sentyabr tarixlərində paytaxt Bakıda keçiriləcək. Yarış müddətində Fövqəladə Hallar Nazirliyinin 30 ədəddən çox xüsusi texnikası və 400 nəfərə yaxın canlı qüvvəsinin cəlb olunması nəzərdə tutulub.

Oxşar xəbərlər

FHN Bakı Şəhər Halqası Əməliyyat Şirkəti ilə birgə marşallar üçün təlimlər keçirir - FOTO

Polkovnik-leytenant: “Formula 1 yarışları tam şəkildə yanğından təhlükəsiz formada hazırlanır”

Baş mütəxəssis: “Keçən illərə nisbətən marşal qadınlarımızın sayı artıb”

FHN-in təşkilatçılığı ilə “Bakı 2025” əməliyyat-taktiki təlimi keçirilib - FOTO

Cəlilabadda fövqəladə hadisələrin nəticələrinin aradan qaldırılması ilə bağlı mülki müdafiə təlimi keçirilib - FOTO