Qadınların şəhərsalma prosesində iştirakı yalnız hüquq məsələsi deyil, həm də keyfiyyətli şəhər quruculuğunun vacib şərtidir.

"Sizinxeber.az" xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova Komitənin təşkilatçılığı ilə Bakıda keçirilən "Qadın iştirakçılarının təbliği" konfransında bildirib.

Dövlət Komitəsinin sədri vurğulayıb ki, qadınların şəhər mühitinə fərqli baxışı "insanyönümlü şəhərlər"in salınmasında həlledici rol oynayır: "Qadınların şəhər mühitinə baxışı fərqlidir. Onların gündəlik həyat təcrübəsi şəhər planlaşdırılmasında təhlükəsizlik, işıqlandırma, ictimai nəqliyyatın əlçatanlığı və sosial infrastruktur kimi məsələlərə daha həssas yanaşmanı zəruri edir. Bu baxımdan onların şəhərsalma prosesində iştirakı yalnız hüquq məsələsi deyil, həm də keyfiyyətli şəhər quruculuğunun vacib şərtidir".

B. Muradova gənc qızların mühəndislik və memarlıq kimi sahələrə cəlb olunması istiqamətində görülən işləri qeyd edib: "Azərbaycanda həyata keçirilən "Zərif mühəndislər" və "Parla" kimi təşəbbüslər texniki sahələrdə qadınların iştirakını gücləndirməklə yanaşı, bu sahədə gələcəyin lider qadın mütəxəssislərinin yetişdirilməsinə xidmət edir. Dövlət Komitəsi olaraq bizim əsas hədəfimiz bu istiqamətdə qadınların yalnız iştirakını deyil, həm də təsir imkanlarını artırmaqdır. Biz genderə həssas siyasətlərin tətbiqini genişləndirməyi, qadınların qərarvermə mexanizmlərində yerini möhkəmləndirməyi və şəhər mühitində onların təhlükəsizliyini təmin edən yanaşmaları təşviq etməyi prioritet hesab edirik".

Oxşar xəbərlər

Bahar Muradova: "WUF13 Azərbaycan üçün yeni mərhələdir"

Bahar Muradova: Azərbaycanda ibtidai təhsil alan qadınların göstəricisi 98 faiz təşkil edir

Bahar Muradova: Azərbaycan regionda lider dövlətdir, bu liderliyin əldə olunmasında qadınların böyük rolu var

Bahar Muradova: Qadının iqtisadi müstəqilliyi olmadan sosial və ictimai müstəqilliyi mümkün deyil

Bahar Muradova Yevlaxda vətəndaşları qəbul edəcək