Mənzil-qərargahı Londonda yerləşən "Nova Era Global" ("NE Global") beynəlxalq media təşkilatında Azərbaycanda iyunun 1-3-də keçirilmiş Bakı Enerji Həftəsi barədə məqalə dərc olunub.

"Report" xəbər verir ki, materialda tədbir çərçivəsindəki əsas müzakirə mövzuları qeyd olunub.

Müəllif vurğulayıb ki, Bakı Enerji Həftəsi enerji təhlükəsizliyi və regional əməkdaşlıq məsələlərini müzakirə etmək üçün hökumət nümayəndələrini, beynəlxalq enerji şirkətlərini, maliyyə institutlarını və sahə ekspertlərini bir araya gətirib:

"Azərbaycan Prezidenti İlham Əliyev tədbirin açılışında çıxış edərək bərpa olunan enerji mənbələrinin inkişafı ilə yanaşı enerji təhlükəsizliyinin təmin edilməsinin vacibliyini vurğulayıb".

Qeyd edilib ki, ABŞ dövlət katibinin iqtisadi, enerji və biznes məsələləri üzrə köməkçisi Kaleb Orr ABŞ Prezidenti Donald Trampın qlobal enerji təhlükəsizliyinin təmin olunmasında Azərbaycanın rolunun qeyd edildiyi müraciətini iştirakçılara oxuyub.

Materialda bildirilib ki, Bakı Enerji Forumu çərçivəsində Azərbaycanın energetika naziri Pərviz Şahbazov ölkələri enerji resurslarının tədarük marşrutları və mənbələrini şaxələndirməyə çağırıb. Bundan əlavə, həftə çərçivəsində D-8 İqtisadi Əməkdaşlıq Təşkilatına üzv ölkələrin energetika nazirlərinin ilk iclası keçirilib.

Tədbirdə iştirak edən Azərbaycan Prezidentinin xüsusi nümayəndəsi Elçin Əmirbəyov ölkənin Avropanın enerji təhlükəsizliyi üçün əhəmiyyətini qeyd edib.

"Azərbaycan Avropa İttifaqına üzv 10 dövlət daxil olmaqla, 16 ölkəyə təbii qaz tədarük edir. 2035-ci ilə qədər ölkənin enerji sisteminin təxminən 42 %-ni bərpa olunan enerji mənbələri təmin edəcək", - materialda vurğulanıb.

Nəşr imzalanmış sazişlərə xüsusi diqqət ayırıb: "Azərbaycan Dövlət Neft Şirkəti (SOCAR) və Azərbaycanın İqtisadiyyat Nazirliyi xarici tərəfdaşlarla ümumi məbləği təxminən 7,5 milyard ABŞ dollar olan saziş və memorandumlar imzalayıb".

"NE Global" əsas sənədlər arasında Azərbaycan və ABŞ arasında kritik mineralların və nadir torpaq elementlərinin tədarükü sahəsində sazişi, həmçinin SOCAR, "TotalEnergies", XRG və BOTAŞ arasında Abşeron yatağından 15 il ərzində (2029-cu ildən başlayaraq - red.) Türkiyə bazarına 30 milyard kubmetr qazın tədarük edilməsinə dair sazişi xüsusi qeyd edib.

Oxşar xəbərlər

İlham Əliyev: Azad olunmuş ərazilərin “yaşıl enerji” zonası kimi inkişafı dayanıqlı enerji strategiyasının əsas istiqamətidir

Prezident: "Strateji yanaşmalar enerji sektorunda Azərbaycanın inkişafına yeni imkanlar yaradır"

Azərbaycan Prezidenti: "Bakı Enerji Həftəsi" nüfuzlu platformaya çevrilib

Kaleb Orr: Azərbaycan regionun enerji təhlükəsizliyində mühüm rol oynayır

İlham Əliyev: Azərbaycanın həyata keçirdiyi enerji siyasəti bu gün də mühüm nəticələr verməkdədir