Pakistan və Azərbaycan regional əməkdaşlıq, ticarət və investisiyaların inkişafına diqqət yetirməklə ikitərəfli əlaqələrin möhkəmləndirilməsinə sadiq qalmaqda davam edirlər.

“Report”un Pakistan KİV-ə istinadən verdiyi məlumata görə, bunu iqtisadiyyat nazirinin müavini Səməd Bəşirli İslamabada səfəri çərçivəsində Pakistanın federal rabitə naziri Abdul Alim Xanla görüşdə bildirib.

A.Xan vurğulayıb ki, Pakistanın Azərbaycanla uzunmüddətli dostluğu mühüm strateji üstünlükdür. O, Pakistanın Hindistanla münaqişəsi dövründə rəsmi Bakının davamlı dəstəyini xatırladıb və qeyd edib ki, Azərbaycan çətin zamanlarda etibarlı tərəfdaş olaraq qalır.

Nazir əmindir ki, işgüzar əlaqələrin möhkəmləndirilməsi və regional ticarət dəhlizlərinin inkişafı uzunmüddətli əməkdaşlıq üçün möhkəm təməl yaradacaq: "Pakistan 250 milyondan çox əhalisi olan nəhəng bazar təklif edir. Bundan əlavə, ikitərəfli iqtisadi qarşılıqlı fəaliyyət üçün geniş imkanlar mövcuddur".

A.Xan həmçinin Azərbaycana son səfəri ilə bağlı təəssüratlarını bölüşüb. Onun sözlərinə görə, Bakının suvenir mağazalarında tez-tez Azərbaycan, Türkiyə və Pakistanın dövlət bayraqlarını görmək olur ki, bu da sıx dostluq əlaqələrini simvolizə edir.

"Milli tədbirlər zamanı Pakistan vətəndaşları tez-tez Azərbaycan və Türkiyə bayraqlarını dalğalandırır - bu, möhkəm xalq dostluğunun əlamətidir", - o əlavə edib.

Öz növbəsində, Səməd Bəşirli Azərbaycanın Pakistanla ticari-iqtisadi əlaqələrin genişləndirilməsində maraqlı olduğunu təsdiqləyib.

Tərəflər iqtisadi əməkdaşlığı aktivləşdirmək barədə razılaşıblar və ikitərəfli işgüzar əlaqələrin inkişafına töhfə verən İslamabaddakı Pakistan-Azərbaycan Ticarət Palatasının mühüm rolunu vurğulayıblar.

Oxşar xəbərlər

Səməd Bəşirli: "Azərbaycanda 3 300-dən çox aktiv Pakistan şirkəti var"

Azərbaycan Pakistanla investisiya əməkdaşlığını müzakirə edib

Azərbaycan Pəncabda Ticarət Evi açıb

Azərbaycan Pakistanla işgüzar dairələr arasında əlaqələrin möhkəmləndirilməsini müzakirə edib

Nazir: Azərbaycanın D-8-ə qoşulması Pakistanla iqtisadi əməkdaşlığın gücləndirilməsi üçün yeni imkanlar açır