Heykəltəraş: Düşündüm ki, Nizami kimi mühüm simanın heykəlini Çində ucaltmalıyam

“Nizami Gəncəvi dünya mədəniyyətinin mühüm simalarındandır. Buna görə də düşündüm ki, onun heykəlini ucaltmalıyam”.

Bunu Sizinxeber.az-ya açıqlamasında böyük Azərbaycan şairinin Pekinin Çaoyan parkında qoyulmuş büstünün müəllifi Cintay İncəsənət Muzeyinin direktoru, professor, heykəltəraş Yüen Sikun deyib.

O bildirib ki, Nizami Gəncəvi heykəltəraşın həmyerlisi şair Su Dunpodan 104 il sonra yaşasa da onların düşüncə və duyğu dünyalarından ortaq cəhətlər çoxdur.

“Nizami əsərlərini bir amal, bir ideya ilə əlaqədar yazırdı. Su Dunpo da sadə həyat yaşayıb. O, nə tütün çəkirdi, nə də lüzumsuz vərdişlərə aludə idi – sağlam yaşamaq onun üçün həyat fəlsəfəsi idi. Bu xüsusiyyətləri ilə o da Nizami Gəncəvi ilə bir çox baxımdan oxşar idi”.

Heykəltəraş vurğulayıb ki, bəşəriyyətin qabaqcıl ideyaları heç vaxt tək bir millətin yaratdığı dəyərlər olmayıb – bunlar bütün insanlığın ortaq sərvətidir: “Məhz bu səbəbdən, mən Çaoyan parkında bu müdriklərin heykəllərini ucaltdım. İstəyirəm ki, çinli uşaqlar da bilsinlər ki, dünyadakı qabaqcıl fikirlər yalnız bir millətə aid deyil, bütün bəşəriyyətə məxsusdur. Bu müdriklərdən öyrənmək lazımdır”.

Qeyd edək ki, Nizami Gəncəvinin büstü 2012-ci ildə quraşdırılıb. 2021-ci ildə Azərbaycan Prezidentin Sərəncamı ilə heykəltəraş Yüen Sikun “Dostluq” ordeni ilə təltif olunub.