Dövlət Miqrasiya Xidməti (DMX) Bakı-Tbilisi-Bakı marşrutu üzrə ölkə ərazisinə səfər edən əcnəbilər və vətəndaşlığı olmayan şəxslər üçün Böyük Kəsik dəmir yolu stansiyasında miqrasiya xidmətləri göstərməyə başlayıb.

"Report" xəbər verir ki, bu barədə qurumun yaydığı müraciətdə qeyd olunub.

Bildirilib ki, qatarın stansiyada dayanacağı müddət ərzində Bakı-Tbilisi-Bakı marşrutu üzrə ölkə ərazisinə səfər edən əcnəbilərə və vətəndaşlığı olmayan şəxslərə miqrasiya xidmətləri operativ qaydada göstərilir.

Qeyd edək ki, Nazirlər Kabinetinin qərarına əsasən, Azərbaycan vətəndaşlarının və ölkəyə vizasız gəlmə hüququ olan bütün xarici ölkə vətəndaşlarının Azərbaycanla Gürcüstan arasında Bakı-Tbilisi-Bakı marşrutu üzrə dəmiryol nəqliyyatı vasitəsilə giriş-çıxışı mayın 25-i saat 00:00-dan etibarən bərpa edilib.

Xatırladaq ki, Azərbaycanın miqrasiya qanunvericiliyinə əsasən ölkə ərazisində 15 gündən artıq müvəqqəti olan əcnəbilər və ya vətəndaşlığı olmayan şəxslər olduğu yer üzrə qeydiyyata alınmalıdırlar. Viza tələb olunmayan qaydada Azərbaycana gələn əcnəbilərin və vətəndaşlığı olmayan şəxslərin ölkədə müvəqqəti olma müddəti ölkənin tərəfdar çıxdığı beynəlxalq müqavilələrdə nəzərdə tutulmuş hallar istisna olmaqla, 90 gündən artıq ola bilməz. Nazirlər Kabinetinin qərarına əsasən Rusiya vətəndaşlarının Azərbaycanda müvəqqəti olma müddəti isə bir təqvim ili ərzində 90 gün müəyyən edilib.

Bakı-Tbilisi-Bakı marşrutu üzrə dəmiryol nəqliyyatı vasitəsilə daşınan sərnişinlərin rahatlığının təmin edilməsi, mümkün əlavə prosedurların tətbiqi ilə bağlı yarana biləcək ləngimə hallarının qarşısının alınması məqsədilə miqrasiya qanunvericiliyinin yuxarıda sadalanan tələblərini pozması ehtimal edilən əcnəbilər və vətəndaşlığı olmayan şəxslər ölkə ərazisini tərk edənədək DMX-nin regional miqrasiya baş idarələri (idarələri) və ya "ASAN xidmət" mərkəzlərində fəaliyyət göstərən "miqrasiya xidmətləri" işçi pəncərələrinə müraciət edə, eləcə də Xidmətin rəsmi internet səhifəsinin "Elektron xidmətlər" bölməsi vasitəsilə miqrasiya sahəsində qanunvericiliyin pozulmasına görə ölkədən gedişlərinə və ölkəyə gəlişlərinə tətbiq edilmiş məhdudiyyət barədə həm ölkə ərazisində olarkən, həm də ölkə ərazisinə gəlmədən məlumat əldə edə bilərlər.

Oxşar xəbərlər

DMX 5 ildir Azərbaycanda olan əcnəbilər və vətəndaşlığı olmayan şəxslərə müraciət edib

Departament rəisi: Bakı-Tbilisi-Bakı marşrutu üzrə qatarla illik 100 min sərnişinin daşınması gözlənilir

Miqrasiya Xidməti COP29 ilə əlaqədar Azərbaycana səfər edən əcnəbilərə və vətəndaşlığı olmayan şəxslərə müraciət ünvanlayıb

Bakıdan Tbilisiyə qatarlar hər gün saat 23:10-da yola düşəcək

DMX Azərbaycana səfər edən Rusiya vətəndaşlarına müraciət edib