Ukrayna ilə münaqişənin nizamlanması ilə bağlı danışıqlar 2022-ci il İstanbul sənədi əsasında aparıla bilər.

“Sizinxeber.az” xəbər verir ki, bunu TASS-a müsahibəsində Rusiya Xarici İşlər Nazirliyinin MDB ölkələri üzrə ikinci departamentinin rəhbəri Aleksey Polişuk deyib.

O bildirib ki, danışıqlara başlamaq üçün Volodimir Zelenskinin legitimliyi və onun Moskva ilə danışıqların aparılmasını qadağan edən fərmanının hüquqi aspektlərini həll etmək lazımdır.

"Rusiya tərəfi real təkliflərə açıq və ciddi söhbətə hazırdır. Dəfələrlə qeyd edildiyi kimi, sülh nizamlanması Ukraynanın neytral, blokdan kənar nüvəsiz statusu, demilitarizasiyası və denasifikasiyası, ərazisində xarici qoşunların və bazaların yerləşdirilməməsi, müasir ərazi reallıqlarının nəzərə alınması və Ukrayna böhranının bütün səbəblərinin aradan qaldırılması barədə 2022-ci il İstanbul sənədi əsasında mümkündür", - diplomat vurğulayıb.

Qeyd edək ki, Kreml Ukrayna Prezidenti Volodimir Zelenskini səlahiyyət müddətinin başa çatdığını əsas gətirərək qeyri-legitim dövlət başçısı hesab edir.

V.Zelenski 2019-cu ildə Ukrayna prezidenti seçilib, həmin il mayın 20-də vəzifəsinin icrasına başlayıb. Bu ölkədə dövlət başçısı beş il müddətə seçilir, seçkilər 2024-cü ilin martında keçirilməli idi. Lakin Ukrayna qanunvericiliyinə əsasən, ölkədə hərbi vəziyyətin tətbiqi zamanı, o cümlədən prezident seçkilərinin keçirilməsi qadağandır.

Ölkədə hərbi vəziyyət 2022-ci il fevralın 24-dən tətbiq olunur və Ukrayna parlamenti onu hər üç aydan bir uzadır.

Oxşar xəbərlər

Rusiya XİN rəhbəri Ukrayna ilə danışıqların şərtini açıqlayıb

Zelenskinin nümayəndəsi: Ukrayna hazırda Rusiya ilə danışıqlara hazır deyil

Lavrov: Moskva Ukrayna ətrafındakı vəziyyəti həll etmək üçün danışıqlara hazırdır