Lavrov və Fidanın Moskva danışıqlarında müzakirə edəcəyi əsas məsələlər açıqlanıb

Rusiya xarici işlər naziri Sergey Lavrov türkiyəli həmkarı Hakan Fidanla Moskvada Ukrayna ilə İstanbul danışıqlarından sonrakı vəziyyəti müzakirə edəcək.

APA-nın Moskva müxbiri xəbər verir ki, bu barədə Rusiya Xarici İşlər Nazirliyinin Türkiyə xarici işlər naziri Hakan Fidanın mayın 26-27-də Moskvaya səfəri öncəsi yaydığı bəyanatda bildirilib.

Həmçinin qeyd olunub ki, Lavrov və Fidan görüşdə Qara dənizdə gəmiçilik təhlükəsizliyi məsələsini də müzakirə edəcəklər. Bildirilib ki, illərin sınağından çıxmış balanslaşdırılmış və dinamik Rusiya-Türkiyə siyasi dialoqu Rusiya Federasiyasının Prezidenti Vladimir Putin və Türkiyə Respublikasının Prezidenti Rəcəb Tayyip Ərdoğan tərəfindən müəyyən edilir. Ötən il ölkələrimizin liderləri Şanxay Əməkdaşlıq Təşkilatına üzv ölkələrin Dövlət Başçıları Şurasının Astanada keçirilən iclası və Kazanda keçirilən BRİCS sammiti çərçivəsində şəxsən görüşüblər. 2024-2025-ci illərdə dövlət başçıları arasında 9 telefon danışığı baş tutub. Sonuncusu bu ilin mayın 11-də olub.

Dövlət başçılarının müəyyən etdiyi ritm Rusiya və Türkiyənin xarici işlər nazirləri tərəfindən dəstəklənir. Regional və beynəlxalq məsələlər üzrə sıx əlaqələri gücləndirmək üçün xarici siyasət qurumları arasında etibarlı və səmərəli qarşılıqlı fəaliyyət forması olduğunu sübut edən XİNlərarası məsləhətləşmələr keçirilir.

İkitərəfli əməkdaşlığın dinamikası parlamentlərarası əlaqələr tərəfindən fəal şəkildə dəstəklənir.

Qarşıdan gələn görüş zamanı nazirlər Cənubi Qafqaz, Liviya, Suriya və Qara dəniz regionunda mövcud işlərin vəziyyətini müzakirə edəcəklər. Onlar İstanbulda Rusiya-Ukrayna danışıqlarından sonra vəziyyətin inkişafı ilə bağlı ətraflı fikir mübadiləsi aparacaqlar. Qara dənizdə təhlükəsiz gəmiçilik mövzusu müzakirə olunacaq.

Rusiya və Türkiyə Suriyada vəziyyətin normallaşması prosesinə mühüm töhfə verir. Sergey Lavrov və Hakan Fidan Suriyanın yeni hakimiyyət orqanlarına ölkədə inklüziv siyasi dialoqun daha da qurulması və sosial-iqtisadi həyatın dinc məcraya qaytarılması üçün ardımın göstərilməsi məsələsinə diqqət yetirəcəklər.

Liviya istiqamətində əməkdaşlığın yaxşı təcrübəsi toplanıb. Liviya ilə bağlı türkiyəli həmkarlarımızla qurumlararası əlaqələri davam etdirmək əzmindəyik.

Cənubi Qafqazda əməkdaşlığın dərinləşdirilməsi, o cümlədən nəqliyyat əlaqələrinin və kommunikasiyaların açılması, regionun münaqişədən sonra yenidən qurulması məsələlərinin ətraflı araşdırılması planlaşdırılır. Rusiya və Türkiyə dinc və proqnozlaşdırıla bilən Cənubi Qafqazda maraqlıdır. Buna 3+3 Regional Əməkdaşlıq Platforması çərçivəsində birgə səylərlə nail olmaq olar. Moskva Ermənistan-Türkiyə münasibətlərinin normallaşması prosesini alqışlayır.

Qərbin daimi təzyiqinin çətin şəraitində ikitərəfli ticarət-iqtisadi əməkdaşlıq ayrıca müzakirə mövzusu olacaq. Nazirlər bank xidmətlərinin təkmilləşdirilməsi və ölkələr arasında ticarətin şaxələndirilməsi üçün əlverişli mühitin yaradılması məsələlərinə diqqət yetirəcəklər. Onlar Ticarət-İqtisadi Əməkdaşlıq üzrə Rusiya-Türkiyə Birgə Hökumətlərarası Komissiyasının 19-cu iclasının məzmununu müzakirə edəcəklər.

Danışıqlarda Akkuyu Atom Elektrik Stansiyasının tikintisi, “Mavi axın” və “Türk axını” qaz kəmərlərinin istismarı mövzularına toxunulacağı gözlənilir.

"Türkiyə vətəndaşlarımız üçün ən cəlbedici turizm məkanlarından biri olaraq qalır. 2024-cü ilin nəticələrinə görə rusiyalılar xarici turistlər arasında saylarına görə növbəti dəfə birinci yeri tutublar. Ölkəyə 6,7 milyon Rusiya vətəndaşı səfər edib ki, bu da ümumi turist axınının təxminən 12,7%-ni təşkil edib. Bu baxımdan ölkənin kurortlarında rusiyalıların təhlükəsizliyinin təmin edilməsinə ciddi diqqət yetiriləcək.

Rusiya tərəfi nazirlərin Moskvada keçiriləcək görüşünün iki dövlət arasında əlaqələrin dərinləşməsinə və daha proqnozlaşdırıla bilən regional təhlükəsizlik arxitekturasının formalaşmasına mühüm töhfə verəcəyini gözləyir",- deyə Rusiya XİN-nin bəyanatında bildirilib.