Ənənəvi olaraq astma üçün istifadə edilən teofilin dərmanı, konvulsiv hərəkətlərə (silkələnmə/diksinmə və ya tonik epileptik tutma) səbəb olan nadir nevroloji pozğunluğun simptomlarını yüngülləşdirir.

“Report” xəbər verir ki, Martin Lüter Universitetinin Halle-Vittenberq (MLU) alimlərinin araşdırması “Movement Disorders” (MD) jurnalında dərc olunub.

Söhbət ADCY5 geninin mutasiyası ilə bağlı diskineziya kimi tanınan xəstəlikdən gedir. Bu genetik pozğunluq körpəlikdə özünü büruzə verir, səyirmə və idarəolunmaz hərəkətlərlə müşayiət olunur. Hazırda onun xüsusi müalicəsi yoxdur.

Əczaçılıq institutunun professoru Andrea Sintsinin dediyinə görə, kofeinin diskineziyaya qısamüddətli müsbət təsiri daha əvvəl bildirilib. Bu səbəbdən tədqiqatçılar oxşar kimyəvi quruluşa malik, lakin daha stabil fəaliyyət göstərən və uşaqlarda istifadəsi təsdiqlənmiş teofilini tədqiq etmək qərarına gəliblər. Onlar diskineziyası olan gənc bir xəstə üzərində sınaqdan keçiriblər.

Eksperimental müalicə təsirli nəticələr verib: uşağın əzələ spazmları əhəmiyyətli dərəcədə azalıb, o, əlil arabası olmadan hərəkət edə bilib, yeriməyə və daha aydın danışmağa başlayıb.

Müalicənin effektivliyini daha böyük bir nümunədə yoxlamaq üçün komanda yeddi ölkədən iki ilə 41 yaş arasında olan 12 diskinezi xəstəsindən məlumat toplayıb. Bütün iştirakçılar teofilin müalicəsi ilə bağlı təcrübələri ilə bağlı anketləri doldurublar.

Alimlərin fikrincə, nəticələr də ümidverici olub: 12 xəstədən 11-i nəzərəçarpacaq yaxşılaşma olduğunu bildirib. Belə ki, nəzarətsiz hərəkətlər daha az olub, yeriş, yuxu keyfiyyəti və ümumi rifah yaxşılaşıb. Baş ağrısı və ya narahatlıq kimi yan təsirlər nadir olub. Bununla belə, alimlər teofilinin xəstəliyin səbəbini aradan qaldırmadığını vurğulayıblar.

Oxşar xəbərlər

Alimlər vaksinlərin nevroloji fəsadlarını açıqlayıblar

Alimlər Avstraliyanın ən nadir heyvanlarının tədqiqində irəliləyiş əldə ediblər

Nadir immun çatışmazlığı olan uşaqların tam müalicə üsulu kəşf edilib

Vərəsəlik hüququ barədə vacib qərar

Tədqiqat: Havanın çirklənməsi epilepsiya riskini artırır