Azərbaycan həm etibarlı təbii qaz təchizatçısı kimi, həm də “yaşıl enerji” potensialı ilə Avropanın enerji təhlükəsizliyi və dekarbonizasiya hədəflərinə töhfə verməyə davam edəcək.

“Report” Energetika Nazirliyinə istinadən xəbər verir ki, bunu Özbəkistanın Daşkənd şəhərində “Dayanıqlı inkişaf naminə tərəfdaşlıq” adı altında təşkil olunan Enerji Həftəsində ölkəmizi təmsil edən energetika nazirinin müavini Orxan Zeynalov bildirib.

Nazir müavini tədbirin açılışı və “Sistemin etibarlılığı və əməkdaşlığın genişləndirilməsi” adlı Nazirlər Dialoqunda iştirak edib.

COP29-a ev sahibliyi etmiş ölkə kimi Azərbaycanın enerji keçidi və qlobal əməkdaşlıq sahəsində təşəbbüslərindən bəhs edən nazir müavini bildirib ki, bu baxımdan, Xəzər dənizində planlaşdırılan “yaşıl enerji” layihələri və yaşıl enerji dəhlizləri təşəbbüsünün strateji əhəmiyyət daşıdığı diqqətə çatdırılıb.

Həmçinin, ölkəmizin enerji trilemması, yəni enerji əlçatanlığı, təchizatın təhlükəsizliyi və bərpa olunan enerjidən istifadənin inkişafı baxımından mühüm mövqe tutduğu qeyd edilib.

Plenar sessiyada ümumi enerji bazarı sahəsində regional əməkdaşlıq strategiyası, müasir enerji bazarının formalaşdırılması üçün əlverişli biznes mühitinin yaradılması, “yaşıl iqtisadiyyat”a keçid strategiyasının həyata keçirilməsi və digər mövzular müzakirə edilib.

Səfər çərçivəsində, eyni zamanda Azərbaycan və Özbəkistan arasında enerji əməkdaşlığı və “Mərkəzi Asiya-Azərbaycan yaşıl Enerji Dəhlizi”nin inkişafı ilə bağlı fikir mübadiləsi aparılıb.

Oxşar xəbərlər

Azərbaycan İsveç ilə Xəzərdə külək enerji layihələrində əməkdaşlığı müzakirə edib

Azərbaycan-Gürcüstan-Türkiyə-Bolqarıstan "yaşıl enerji dəhlizi" layihəsinə dair Memorandumun mətnini razılaşdırıblar

Orxan Zeynalov: "Cəbrayıl enerji qovşağının Naxçıvan və Türkiyəyə birləşdirilməsi ssenarisi nəzərdən keçirilir"

Nazir müavini: "Azərbaycan enerji sektorunu daha çox bərpa olunan mənbələr hesabına şaxələndirir"

Pərviz Şahbazov 3-cü Kəmər və Yol Enerji Nazirləri Konfransına qatılacaq