ABŞ Prezidenti Donald Tramp 1,8 milyard dollarlıq kompensasiya fondunun işə salınması qərarını yenidən nəzərdən keçirir.

"Report" xəbər verir ki, bu barədə "Associated Press" (AP) vəziyyətlə tanış mənbələrə istinadən məlumat yayıb.

Agentliyin məlumatına görə, ABŞ-nin Ədliyyə Nazirliyi əvvəllər məhkəmə qərarı ilə fondun müvəqqəti dayandırıldığını elan edib.

Fond Trampın vergi bəyannamələrinin sızması ilə bağlı Daxili Gəlir Xidmətinə qarşı iddiasının həllinin bir hissəsi olaraq yaradılıb. Güman edilirdi ki, vəsaitlər administrasiyanın Ədliyyə Nazirliyinin əvvəlki rəhbərliyi altında qanunsuz mühakimə olunduğunu düşündüyü şəxslərə ödənişlərə yönəldiləcək.

Lakin, təşəbbüs Konqresdəki respublikaçıların tənqidinə səbəb olub, onlar nəzarət mexanizmlərinin olmaması və 6 yanvar 2021-ci ildə Kapitolidə baş verən iğtişaşların iştirakçılarına ödənişlərin mümkünlüyü ilə bağlı narahatlıqlarını bildiriblər.

AP qeyd edib ki, Tramp siyasi təzyiq fonunda layihədən imtina etməyi düşünür.

Respublikaçı senator Cim Lenkford administrasiyanı fondun ləğvini rəsmi olaraq elan etməyə çağırıb, Senatdakı çoxluğun lideri Con Tyun isə Ağ Evin bu təşəbbüsdən könüllü şəkildə imtina edəcəyinə ümid etdiyini bildirib.

ABŞ Ədliyyə Nazirliyi fondun tətbiqini müvəqqəti olaraq dayandıran federal hakim Leoni Brinkemanın qərarına əməl edəcəyini açıqlayıb. Qadağanın uzadılması ilə bağlı məhkəmə dinləməsi iyunun 12-nə təyin edilib.

Bundan əlavə, Florida ştatındakı federal məhkəmə Trampın vəkillərinə 12 iyuna qədər Daxili Gəlir Xidməti ilə razılaşmanın şərtləri ilə bağlı yazılı izahatlar təqdim etmələri barədə qərar çıxarıb.

Oxşar xəbərlər

Florida Məhkəməsi Trampın ABŞ-nin Vergi Xidmətinə qarşı işi bərpa edib

KİV: Tramp dondurulmuş 5 milyard dollarlıq Rusiya aktivlərini Ukraynaya verə bilər

Tramp Administrasiyası Harvarda ayrılan 2,2 milyard dollarlıq qrantı dondurub

"Politico": Tramp və ailəsinin biznesini yoxlamaq qadağan edilib

159 milyardı geri qaytarmalıyıq - Tramp