Azərbaycanın öz suveren əraziləri üzərində tam nəzarəti bərpa etməsi, konstitusiya quruluşunu bütün ərazilərində təmin etməsi və müstəqil siyasət yürüdərək regionun güclü dövlətlərindən birinə çevrilməsi bəzi Avropa institutları, xüsusilə də Avropa Şurası Parlament Assambleyasının (AŞPA) ayrı-ayrı nümayəndələri tərəfindən hələ də obyektiv şəkildə qəbul edilmir.

Bunu "Sizinxeber.az"a açıqlamasında Milli Məclisin deputatı Azər Badamov deyib.

Onun sözlərinə görə, buna görə də Azərbaycana qarşı qərəzli qətnamələrin qəbul edilməsi, insan hüquqları və demokratiya kimi dəyərlərdən siyasi təzyiq aləti kimi istifadə olunması, ölkəyə qarşı ikili standartlara əsaslanan yanaşmaların nümayiş etdirilməsi davam etdirilir:

"Bu baxımdan AŞPA-da Almaniya nümayəndə heyətinin rəhbəri Frank Şvabenin növbəti çıxışı da əvvəlki mövqeyindən fərqlənmir. Onun səsləndirdiyi fikirlər Azərbaycandakı reallıqları əks etdirməyən, qərəzli yanaşmaya və əsassız ittihamlara söykənən iddialardan ibarətdir. Şvabe ölkəmizdə keçirilən seçkilərin demokratikliyi, parlamentin formalaşması, hakimiyyət bölgüsü və məhkəmə sisteminin fəaliyyəti ilə bağlı ittihamlar səsləndirsə də, bu məsələlərə münasibətdə obyektivlik nümayiş etdirmir. Əgər Frank Şvabe üçün həqiqətən insan hüquqları, demokratiya və fundamental azadlıqlar əsas prioritet olsaydı, o zaman 30 ilə yaxın müddətdə öz doğma torpaqlarından didərgin salınmış yüz minlərlə azərbaycanlının pozulmuş hüquqlarından da danışardı. Öz evinə qayıtmaq, doğulduğu yerdə yaşamaq hüququndan məhrum edilmiş 350 mindən çox Qərbi azərbaycanlının və işğal nəticəsində qaçqın və məcburi köçkün vəziyyətinə düşmüş insanların hüquqlarının bərpası məsələsi niyə onun çıxışlarında yer almır? İnsan hüquqları universaldırsa, bu hüquqlar azərbaycanlılara münasibətdə niyə görməzdən gəlinir?".

Deputat qeyd edib ki, Azərbaycan dövləti öz daxili və xarici siyasətini hər hansı beynəlxalq qurumun qərəzli müzakirələri əsasında müəyyənləşdirmir:

"Dövlətimizin siyasi kursu Azərbaycan xalqının milli maraqlarına, ölkənin Konstitusiyasına və milli təhlükəsizlik prioritetlərinə əsaslanır. Bu gün Azərbaycanın əldə etdiyi uğurlar, ərazi bütövlüyünün və suverenliyinin tam bərpası, iqtisadi inkişafı və beynəlxalq nüfuzunun artması bəzi dairələri narahat edə bilər. Lakin bu uğurlar Azərbaycan xalqının iradəsinin, dövlət rəhbərliyinin qətiyyətli siyasətinin və milli birliyin nəticəsidir. Azərbaycanda qanunun aliliyi prinsipi təmin olunur və qanunvericiliyi pozan şəxslər kimliyindən, siyasi baxışlarından və ya statusundan asılı olmayaraq hüquqi məsuliyyət daşıyırlar. Hüquqi məsuliyyətin tətbiqini siyasi təqib kimi təqdim etmək cəhdləri isə ölkəmizdəki reallıqları təhrif etməkdən başqa bir məqsəd daşımır".

A.Badamov əlavə edib ki, Azərbaycanın dövlət müstəqilliyi və suverenliyi müxtəlif dövrlərdə ciddi sınaqlardan keçib:

"Xalqımız həmin çətin mərhələlərin acı nəticələrini yaxşı xatırlayır və dövlətçiliyimizin zəiflədilməsinə yönəlmiş istənilən cəhdlərə qarşı həssas yanaşır. Buna görə də xaricdən ölkəmiz haqqında qərəzli bəyanatlar səsləndirənlərin və Azərbaycanda sabitliyi pozmağa çalışan dairələrin çağırışları cəmiyyətdə dəstək qazanmır. Bu gün Azərbaycan xalqı güclü dövlətin, milli maraqlara əsaslanan siyasətin və əldə olunmuş tarixi nailiyyətlərin yanında olduğunu nümayiş etdirir. AŞPA-da və digər beynəlxalq platformalarda ölkəmizə qarşı səsləndirilən qərəzli çıxışlar isə Azərbaycan cəmiyyətinin mövqeyinə və dövlətimizin inkişaf kursuna təsir göstərmir. Azərbaycan müstəqil dövlətdir və öz gələcəyini xarici təzyiqlər əsasında deyil, xalqının iradəsi və milli maraqları əsasında müəyyənləşdirir".

Oxşar xəbərlər

XİN: AŞPA-da nümayəndə heyətimizin əleyhinə səs vermiş şəxslərin ölkə ərazisinə daxil olmağa icazə verilməyəcək

Parlament sədri: AŞPA gürcü xalqına qarşı alətə çevrilib

XİN rəhbərinin Azərbaycana qarşı səsləndirdiyi fikirlər qəbuledilməzdir - Ayxan Hacızadə

XİN: AŞPA-da nümayəndə heyətimizin əleyhinə səs vermiş şəxslərin Azərbaycana səfərinə icazə verilməyəcək

İcma AŞPA-da təmsil olunan qüvvələrdən Azərbaycana qarşı ayrı-seçkiliyə son qoymağı tələb edib