Türkiyə prezidenti Rəcəb Tayyib Ərdoğan ABŞ prezidenti Donald Trampla Rusiyanın S-400 hava hücumundan müdafiə sistemini müzakirə etmədiyini, lakin F-35 təyyarələri haqda danışdığını bildirib.

“Report” xəbər verir ki, bu barədə TRT telekanalı məlumat yayıb.

Ərdoğan NATO sammitindən sonra Haaqada jurnalistlərlə söhbəti zamanı deyib: "Trampla görüşümüz zamanı S-400-ü müzakirə etmədik. Bu, gündəmimizdə deyildi, məsələ artıq bağlanıb və bitmiş sövdələşmədir. Biz F-35 məsələsini müzakirə etdik".

Türkiyə prezidenti xatırladıb ki, Türkiyə F-35 layihəsi çərçivəsində təxminən 1,3-1,4 milyard dollar ödəniş edib: "Bu təyyarələri almağımıza gəlincə, Trampın bununla bağlı xoş niyyətli olduğunu gördük. Rəsmilərimiz F-35-lərin alınması, həmçinin F-16-larımızın texniki xidməti və təmiri ilə bağlı işləri davam etdirirlər".

O, əlavə edib ki, Ankara Eurofighter qırıcılarının alınması mövzusunda işi davam etdirir: "Bu, Böyük Britaniya və Almaniya ilə davam edir. Ümid edirik ki, bu iki ölkə də bizim yaxşı niyyətimizi müsbət qəbul edəcək".

Oxşar xəbərlər

Ərdoğan Trampla Rusiya-Ukrayna müharibəsini və Yaxın Şərq məsələsini müzakirə edib

Ərdoğan: İlk fürsətdə Donald Trampla üzbəüz görüşəcəyik

Ərdoğan: Trampla dostluğun davam etməsi Türkiyə üçün vacibdir

Ərdoğan Blinkenlə nələri müzakirə etdi?

Rəcəb Tayyib Ərdoğan: Türkiyə Fələstinə dəstəyini bundan sonra da davam etdirəcək