Ciorcia Meloni Avropa liderləri ilə Yaxın Şərqdəki böhranı müzakirə edib

İtaliyanın Baş naziri Ciorcia Meloni Yaxın Şərqdəki böhranın kəskinləşməsi fonunda beynəlxalq tərəfdaşlar və region ölkələrinin rəhbərləri ilə telefon danışıqları aparıb.

APA xəbər verir ki, bu barədə İtaliya Nazirlər Şurası məlumat yayıb.

Məlumata görə, Meloni ilə G7-nin hazırkı prezidenti, Kanadanın Baş naziri Mark Karni, Almaniya Kansleri Fridrix Merts, Fransa Prezidenti Emmanuel Makron və Böyük Britaniyanın Baş naziri Kir Starmer arasında məsləhətləşmələr olub. İtaliyanın Baş naziri, həmçinin Səudiyyə Ərəbistanı, Birləşmiş Ərəb Əmirlikləri və Qətər rəhbərləri ilə müzakirələr aparıb.

Telefon danışıqları zamanı münaqişənin daha da genişlənməsinin qarşısını almağın, böhranın siyasi həllinə nail olmağın və tərəflər arasında danışıqların sürətlə bərpası istiqamətində işləməyin zəruriliyi vurğulanıb. Qeyd olunub ki, İtaliya tərəfləri danışıqlar masasına oturtmaq üçün səylərini davam etdirəcək.