Müəllim barmağına üzük taxdırırsa...

Tovuzda bir məktəbdə, adını təhsilə yox, təəssüf ki, sosial mediada “qızıl mərasimi” ilə gündəmə gətirən müəllimə xəbəri bu gün hamımızı silkələdi. Görüntülər çox şeyi deyirdi: Müəllimə oturub, valideynlər sıraya düzülüb və bir-bir onun barmağına üzük taxır. Dərs yox, danışıq yox, sadəcə təmtəraq, nümayiş və müəllim adından sui-istifadə.

Təhsil dediyimiz şey budurmu? Əgər müəllim barmağına qızıl üzük taxdırırsa, sabah o uşaqlara necə izah edəcək ki, vicdan, dəyər, obyektivlik nədir?

İllərlə demişik ki, müəllim cəmiyyətin sütunudur. Amma bəzən o sütunun altında gizlənib şəxsi mənafe, nümayiş və mənəviyyat boşluğu boy göstərir. Bu hadisə də onlardan biridir.

Valideynin övladını məktəbə göndərmək borcudur. Hədiyyə aparmaq yox, təhsil almaq üçün şərait tələb etmək haqqıdır. Bu tip “göstərişli münasibət” formaları məktəblərdə çoxdan başlayıb – bəzən ad günündə tort gətizdirirlər, bəzən müəllimin “xoşuna gəlmək” üçün açıq-örtülü yarışlar başlayır.

İndi isə barmaqlara üzük... Sabah ev verərlər, maşın açarı apararlar? Bəs sonra bu müəllim o şagirdi necə qiymətləndirəcək? Neyləyəcək? “Çünki anası mənə üzük taxdı, uşağı beşlik yazım?”

Ən dəhşətlisi odur ki, bu, “gülməli” yox, adiləşmiş bir hala çevrilməkdədir. Bu hadisəyə sosial mediada “olsun e, hədiyyədi də” deyənlər tapılırsa, deməli, biz problemin dibini görmürük hələ.

Müəllim nüfuzu yalnız dərs keçməkdə deyil, duruşunda, vicdanında və davranışında gizlidir. Əgər müəllim o nüfuzu barmağına taxdığı üzük qədər qiymətləndirirsə, biz təhsildən yox, tamaşadan danışırıq.

Qazax-Tovuz Regional Təhsil İdarəsi araşdırma başladıb. Araşdırın, yaxşı edirsiniz. Amma sadəcə “araşdırma açıldı” cümlələri ilə bu hadisə bağlanmamalıdır. Əgər fakt təsdiqlənərsə, ictimai nümunə olacaq cəza da olmalıdır.

Çünki bu gün müəllimə barmağına üzük taxdırırsa, sabah o şagirdin şüuruna rüşvətin toxumunu səpir.

Və bu, təhsilin yox, təəssüfün dərsidir.

İzzət Qurbanov
“Sözüm var” layihəsi üçün yazdı.