"İstər böyük, istər uşaq olsun, hər kəs risk altındadır" - İnfeksionistdən qızılca ilə bağlı ÇAĞIRIŞ

Məlum olduğu kimi, Səhiyyə Nazirliyinin məlumatına əsasən son aylarda digər ölkələrdən gətirilmə hadisələrlə əlaqəli qızılcaya yoluxma halları Azərbaycanın müxtəlif regionlarında infeksiyanın yerli yayılmasına səbəb olub. Ölkə ərazisində qeydə alınmış qızılca hadisələri arasında bəzən risk qrupuna aid uşaqlarda ağırlaşmalar, yanaşı bakterial infeksiyaların inkişafı, gecikmiş müraciətlər və ya yanlış diaqnostika hallarına rast gəlinir.

Uşaqların sağlamlığının qorunması və yoluxma hallarının qarşısının alınması məqsədil ilə ölkədə qüvvədə olan “Profilaktik peyvəndlər təqvimi”nə əsasən 1 və 6 yaşlarında olan bütün uşaqlar 2 dəfə qızılca, epidemik parotit və məxmərək infeksiyalarına qarşı vaksinasiya olunmalıdırlar.

Bəs, qızılca pandemiya halına çevrilə bilərmi?

Məsələ ilə bağlı Redaktor.az-a danışan ‎infeksion xəstəlikləri və klinik mikrobiologiya uzmanı Vasif Əliyev bildirdi ki, qızılca halları sayca uşaqlar arasında deyil, eyni zamanda böyüklər arasında da yayılıb.

Onun sözlərinə görə, qızılca çox yoluxdurucu bir virus olduğuna görə təmas sonrası rahatlıqla başqa sağlam şəxslərə yayıla bilir:

"İstər böyük, istər uşaq olsun, hər kəs risk altındadır. Amma kim ki, daha öncə peyvənd vurdurub və ya bu xəstəliyi keçiribsə, onlar risk altında deyillər. Onlarda artıq qoruyuculuq var. Ona görə düşünmürəm ki, bir pandemiya halına çevrilsin. Çünki rutin olaraq onsuz da qızılcaya qarşı davamlı peyvəndlər vurulur.

Təbii ki, bəzi insanlar bəlkə də tərəddüd etdiklərinə görə vurdurmayıblar. Burada müxtəlif yaş qruplarından söhbət gedir. Onlar hazırda xəstəliyə qarşı risk altındadırlar. Ancaq hazırkı yoluxduruculuq qabiliyyətinin yüksək olduğunu nəzərə alaraq və ən etibarlı yol kimi bu xəstəlikdən qorunmaq üçün peyvənd vurdurmaqdır. Ona görə də tövsiyə edirəm hər kəs peyvənd vurdursun. Xüsusilə əgər bu cür xəstələrlə təmas varsa, üç gün ərzində peyvənd olunmağı unutmasınlar".