Tomas Praynl: Beynəlxalq ictimaiyyət minaların təmizlənməsində Azərbaycana daha çox dəstək verməlidir

Beynəlxalq ictimaiyyət Azərbaycana humanitar minatəmizləmə sahəsində daha çox dəstək verməlidir.

Bunu “Sizinxeber.az”un Cəbrayıldakı müxbirinə almaniyalı səyyah Tomas Praynl deyib.

“Azərbaycanın azad edilmiş torpaqlarını tez bir zamanda minalardan təmizləmək lazımdır. Bu, BMT və digər təşkilatlar üçün prioritet məsələ olmalıdır”, - o bildirib.

Səyyahın sözlərinə görə, minalar müharibə başa çatdıqdan sonra da mülki əhalinin üzləşdiyi faciəli reallıqdır.

“Mən İraqda, Əfqanıstanda, Balkanlarda olmuşam. Ancaq bu problemin miqyası ilə ilk dəfə burada, Qarabağda rastlaşdım. Minalar - əsassız şəkildə qurbanlar deməkdir. Əksər hallarda, sadəcə olaraq, onların üzərinə basan sadə insanlar əziyyət çəkir”, - o qeyd edib.

Praynl əlavə edib ki, o, piyada əleyhinə minalara qlobal qadağa ideyasını tam dəstəkləyir.